A directiva de Costa da Morte Asociación Turística (CMAT) mantén unha nova reunión durante FITUR con Raquel Sánchez, presidenta da rede de Paradores, para falar sobre diferentes cuestións relacionadas coa política de apertura do Parador de Costa da Morte.
ZAS, 30/01/2025. A Feira Internacional do Turismo de Madrid (FITUR) 2025 serviu como escenario para un novo encontro entre a CMAT e Raquel Sánchez, presidenta de Paradores. Nesta reunión, de ton cordial e fraternal, ambas partes puxeron en común aspectos relacionados coa apertura do Parador de Muxía durante o ano e as políticas de dispoñibilidade de aloxamentos.
O Parador de Muxía, aberto todo o ano
Para a CMAT, que xa lle trasladou as súas propostas a Raquel Sánchez tanto en FITUR 2024 como no IV Encontro de Turismo da Costa da Morte celebrado en Vimianzo, é importante que o Parador de Costa da Morte, situado en Muxía, estea aberto durante o maior tempo posible durante o ano. Esto suporía apostar por unha desestacionalización turística que favorecería a todo o sector non só na vila de Muxía, senón en toda a Costa da Morte.
Pola súa banda, a presidenta da rede de Paradores, que se mostra aberta a darlle continuidade aos contactos coa CMAT neste tema, está estudando as propostas para poder dar unha solución o antes posible.
Unha política que favoreza o turismo da contorna
Outra das propostas achegadas pola CMAT durante FITUR consiste en que o Parador de Muxía, nos momentos en que teña a súa capacidade de aloxamento chea, poida redirixir aos seus clientes a outros establecementos hosteleiros da Costa da Morte.
Con esta medida, estaríase evitando que estas persoas fosen redirixidas a outros aloxamentos da rede de Paradores situados fóra da Costa da Morte e mesmo de Galicia, perxudicando ao sector hosteleiro da contorna.
Desde a CMAT, valórase positivamente a predisposición da presidenta da rede de Paradores, Raquel Sánchez, para continuar dialogando e atopando as mellores solucións para o turismo na Costa da Morte.
