MADRID, 24/01/2024. A Costa da Morte ven de exhibir o seu gran potencial turístico durante a Feira Internacional do Turismo (FITUR) que se celebra en Madrid do 22 ao 26 de xaneiro e que reúne a diferentes axentes públicos e privados do turismo nacional e internacional.
Durante as dúas primeiras xornadas, foron presentadas diferentes propostas turísticas por parte dos municipios pertencentes ao xeodestino Costa da Morte. Na tarde do xoves 23, a propia CMAT presentou, xunto a representantes da Deputación da Coruña e de Turismo de Galicia, o vídeo promocional «Costa da Morte, Naturalmente Salvaxe» e a campaña da Asociación de Profesionais do Turismo da Costa da Morte (APTCM) «Temporada de Mar».
A presentación «Costa da Morte, Naturalmente Salvaxe»
Durante o acto de presentación oficial da CMAT en FITUR, tiveron a oportunidade de intervir tanto Manuel Muíño, presidente da CMAT; como Xosé Manuel Merelles, presidente da axencia Turismo de Galicia; Xosé Regueira, vicepresidente da Deputación da Coruña; e Pepe Formoso, presidente de APTCM e secretario da CMAT.
A presentación xirou en torno a dous importantes eixos: tanto a importancia da colaboración pública e privada que se da na CMAT, froito do traballo conxunto dos 17 concellos e dos empresarios a traves de APTCM; como o valor turístico que a Costa da Morte ten nas diferentes épocas do ano.
Ao inicio da presentación, Manuel Muíño aproveitou para agradecer a presenza de asistentes e relatores e destacar a Costa da Morte como un destino turístico sostible, co gran valor engadido do astroturismo: «O stand da Costa da Morte en FITUR é o mellor lugar para atopar unha expresión xigante de cores, sons e patrimonio material e inmaterial. Para descubrir unha inmensa conxunción de sabores, olores, mar, terra e ceo estrelado; unha máxica espiritualidade que envolve a todo o mundo que visita este xeodestino Naturalmente Salvaxe. Todo isto e máis é o que ofrece a Costa da Morte os 365 días do ano, durante as catro estacións, incluído o inverno». Trala súa intervención, dou paso á proxección do vídeo promocional «Costa da Morte, Naturalmente Salvaxe».
Pola súa banda, Xosé Manuel Merelles, director de Turismo de Galicia, apuntou a gran relevancia da Costa da Morte para o turismo de Galicia: «Ver 17 concellos que se unen para formar un destino turístico tan potente como a Costa da Morte é moi satisfactorio. É moi relevante e sitúase como un dos máis activos de toda a comunidade autónoma, sempre ofrecendo o mellor baixo as premisas de calidade e sustentabilidade». Ademais, Merelles tamén engadiu a «importancia da colaboración pública e privada no desenvolvemento do xeodestino Costa da Morte».
Xosé Regueira, vicepresidente da Deputación da Coruña, destacou sobre todos os atractivos da Costa da Morte o valor do seu patrimonio intanxible: «A Costa da Morte é moito máis que paisaxes, gastronomía e as súas xentes. O fantástico da Costa da Morte é que ten todo iso e ademais un patrimonio intanxible que é de máximo nivel e o seu atractivo é enorme en calquera estación».
Tamén fixo referencia ao valor da desestacionalización Pepe Formoso, presidente de APTCM, que tras a presentación e proxección do vídeo promocional da campaña «Temporada de Mar», fixo un alegato en favor da colaboración público-privada: «Somos admirados como destino grazas ao traballo conxunto dos empresarios e dos 17 concellos da Costa da Morte, onde contamos con temporada e productos de calidade todo o ano. Xa temos 365 días ao ano para desfrutar deste magnífico territorio».
Esta presentación e o papel xeral da CMAT en FITUR poñen de manifesto a imprescindible simbiose que se da na Costa da Morte entre os sectores público e privado. Grazas a esta colaboración entre os axentes de ambos sectores, FITUR está servindo para que a CMAT dea a coñecer o xeodestino a deceas de empresas de turoperación e axencias de viaxes coas que se crearán sinerxias que impulsarán as oportunidades turísticas na Costa da Morte.
