A xunta directiva da CMAT – Costa da Morte Asociación de Turismo reuniuse este martes 3 de marzo na Casa do Pendón, co alcalde de Cabana de Bergantiños como anfitrión.
Esta sesión supón o inicio do novo modelo de reunións itinerantes, unha medida acordada desde os membros da actual directiva co obxectivo de favorecer unha maior participación e implicación do conxunto dos concellos asociados na vida ordinaria da entidade.
A partir de agora, as reunións mensuais celebraranse de maneira rotatoria nos concellos que non forman parte da xunta directiva. Deste xeito, facilitarase que os socios poidan asistir ás sesións con voz, coñecer de primeira man os asuntos tratados e achegar propostas e reflexións sobre a xestión turística do territorio.
Durante a reunión abordáronse tamén cuestións relacionadas coa planificación estratéxica da entidade e coa coordinación das accións previstas para o presente exercicio, dentro da folla de ruta marcada no plan de acción.
Con esta iniciativa, a CMAT dá un paso máis na súa aposta por un modelo de gobernanza máis aberto, descentralizado e próximo, reforzando a cohesión interna e garantindo que todos os concellos socios teñan a oportunidade de participar activamente máis alá da Asemblea Xeral Ordinaria anual.
Precisamente, a finais deste mesmo mes celebrarase a Asemblea Xeral Ordinaria, na que se someterán á aprobación as contas correspondentes ao exercicio 2025, os orzamentos para 2026 e se realizará unha revisión do plan de acción, co fin de avaliar o seu grao de execución e adaptar as liñas de traballo ás necesidades actuais do destino.
A CMAT – Costa da Morte Asociación de Turismo continúa así traballando para consolidar un modelo turístico coordinado, participativo e representativo do conxunto da Costa da Morte, reforzando a colaboración institucional e a unidade do territorio como destino.
