A CMAT – Costa da Morte Asociación Turística celebrou hoxe nas Escolas do Xardín Agra de Caldas, en Carballo, a segunda presentación da nova unidade didáctica dixital da Costa da Morte, un encontro dirixido aos centros educativos do norte do territorio que tamén contou coa presenza de representantes institucionais, e que puxo o peche ás dúas xornadas de presentación deste novo proxecto educativo impulsado pola entidade.
O acto foi aberto polo alcalde de Carballo, que puxo en valor a importancia deste tipo de iniciativas para seguir fortalecendo o vínculo entre o territorio e as novas xeracións, destacando o papel da educación á hora de fomentar o coñecemento, o respecto e o orgullo pola contorna propia.
Desde a CMAT quixeron agradecer especialmente a asistencia e implicación dos representantes dos centros educativos que participaron tanto nesta presentación como na celebrada previamente en Corcubión.
A asociación sinalou tamén que todos aqueles centros educativos que non puideron asistir ás presentacións recibirán nos próximos días unha circular informativa con toda a documentación e información necesaria para poder acceder e utilizar a unidade didáctica.
Durante os encontros, moitos docentes coincidiron en sinalar o interese de contar con ferramentas deste tipo, que permiten achegar os nenos e nenas á súa propia contorna a través dun aprendizaxe máis próximo, contextualizado e conectado coa realidade do alumnado, fomentando ademais o traballo por proxectos e a participación activa nas aulas.
De feito, desde a CMAT destacaron que algúns dos centros que asistiron á primeira presentación en Corcubión xa lles trasladaron que comezaron a utilizar a unidade nas aulas, unha noticia que a entidade recibiu con especial ilusión ao comprobar a rápida posta en marcha do recurso educativo.
Desde a CMAT subliñaron que este proxecto depende en gran medida da colaboración e implicación dos equipos docentes da comarca, motivo polo que agradeceron especialmente a boa disposición, o interese e as achegas realizadas polo profesorado durante ambas xornadas.
A iniciativa foi realizada ao abeiro da subvención DP0030 da Deputación da Coruña e supón o primeiro paso dun proxecto educativo máis amplo que a CMAT continuará desenvolvendo nos próximos meses con novas unidades didácticas vinculadas ao mar, á pesca e á conservación do litoral grazas ao financiamento dos GALP.
Desde a asociación sinalan que o obxectivo final é que os máis novos coñezan mellor a Costa da Morte, valoren a súa riqueza natural e cultural e se convertan nos mellores embaixadores do territorio.
