A Costa da Morte Asociación Turística (CMAT) continúa o seu intercambio de boas prácticas na comarca de Uribe, da man da Asociación Jata-Ondo, cunha segunda xornada centrada na xestión sostible de destinos, a posta en valor dos recursos e a colaboración público-privada.
A xornada comezou cunha visita a San Juan de Gaztelugatxe, onde a delegación coñeceu o sistema de control de aforo mediante reservas para protexer o entorno natural, e os paneis interactivos instalados para mellorar a experiencia das persoas visitantes.
A continuación, o grupo desprazouse ata Larrabetzu, onde percorreu parte do Camiño de Santiago e a Ruta Medieval.
Un dos momentos destacados foi a visita á empresa La Gilda del Norte, onde a CMAT mantivo un encontro con representantes da Deputación Foral de Bizkaia:
- Leire Sáez, directora de Turismo
- Dicky del Hoyo, responsable de comunicación do Departamento de Transportes, Mobilidade e Turismo
- Aitor Apraiz, asistencia técnica do Departamento de Turismo
Durante a visita abordáronse iniciativas innovadoras para a promoción do produto local e a súa integración na oferta turística do territorio.
Pola tarde, a xornada pechou cunha reunión con empresarios do sector turístico de Uribe —hostalaría, aloxamentos e turismo activo—, na que se tratou o modelo de gobernanza impulsado por Jata-Ondo, que articula a colaboración entre o sector público e o privado en comparación co modelo presente na CMAT.
Unha xornada intensa e inspiradora, que ofrece á CMAT ideas valiosas para seguir fortalecendo un turismo na Costa da Morte.
