A Costa da Morte converteuse hoxe no epicentro da cooperación territorial europea coa celebración do Interreg Cooperation Day 2025, no marco do proxecto Atlantic Sunset, do que a CMAT é entidade asociada.
O evento desenvolveuse en dous enclaves emblemáticos, Cabo Touriñán (Muxía) e Cabo Fisterra (Fisterra), coincidindo coa data na que o último solpor de Europa continental se despraza de Galicia a Portugal.
Acto en Cabo Touriñán (Muxía)
A xornada comezou ás 18:00 horas no Faro de Touriñán cunha recepción institucional e a benvida de representantes como o presidente de Turismo Porto e Norte de Portugal, Luís Pedro Martins, e o director xeral de Patrimonio Cultural da Xunta de Galicia, Ángel Miramontes; momento tamén no que tivo lugar a intervención de José Manuel López Vilela, alcalde da Laracha e presidente da CMAT.
Durante o acto entregáronse placas informativas ao Concello de Carnota – polo Monte Pindo – e de Viana do Castelo (Portugal), recoñecendo a súa integración na rede de puntos emblemáticos do proxecto. O momento máis destacado en Touriñán foi a inauguración oficial da placa que identifica este cabo como lugar privilexiado para contemplar o último solpor da Europa continental, coa participación da tenente de alcalde de Muxía, Sandra Vilela; e do Delegado do Goberno en Galicia, Pedro Blanco Lobeiras.
Acto en Cabo Fisterra
A continuación, a celebración trasladouse á Praza Stephen Hawking en Fisterra, onde ás 19:30 tivo lugar a apertura institucional coa entrega dunha última placa ao Concello de Fisterra, nun acto no que interviñeron o propio alcalde, Luís Insua; o Delegado do Goberno en Galicia, Pedro Blanco; e o Presidente da Xunta de Galicia, Alfonso Rueda.
O programa incluíu tamén a participación de membros da USC, sobre a importancia simbólica da Costa da Morte no imaxinario do Camiño de Santiago e a súa relación co solpor e sobre a dimensión científica deste fenómeno natural ao cargo do científico e divulgador Jorge Mira. A xornada culminou cunha observación e celebración comunitaria do solpor en Fisterra, acompañada de música, que serviu como peche festivo e simbólico do evento.
Atlantic Sunset: poñendo en valor os solpores atlánticos
O proxecto Atlantic Sunset, cofinanciado pola Unión Europea no marco do programa Interreg Atlantic Area Programme, promove unha rede europea de lugares singulares para a observación dos solpores atlánticos. O obxectivo é reforzar a identidade dos territorios, impulsar un turismo sostible, diversificar a economía local e dar visibilidade internacional a enclaves da Costa da Morte.
A celebración do Interreg Cooperation Day 2025 en Galicia consolidou á Costa da Morte como territorio de referencia dentro desta rede europea, combinando natureza, cultura, ciencia e cooperación transnacional.
