Esta cita, xa consolidada como un referente para o sector turístico da comarca, busca favorecer o intercambio de experiencias e impulsar o desenvolvemento económico e social do xeodestino Costa da Morte.
Na súa última edición, celebrada no Pazo de Trasariz (Vimianzo), o encontro reuniu a numerosos representantes públicos e privados implicados na promoción turística da zona. Este ano, o obxectivo volve ser fortalecer a colaboración entre entidades, fomentar sinerxías e consolidar unha rede de traballo conxunto en favor dun turismo sostible e de calidade.
O Pazo de Villar de Francos, escenario escollido para esta edición na última reunión da Xunta Directiva, é un espazo cargado de historia e simbolismo. O edificio ergueuse arredor dunha antiga torre defensiva do século XVI e desenvolveuse ao longo do XVII. Durante anos foi residencia do marqués de Atalaya, que o habitou ata a década dos noventa. A elección deste emblemático pazo como sede do encontro foi acordada na última reunión da xunta directiva da CMAT, celebrada o pasado 1 de outubro.
Durante a xornada, a asociación fará balance das accións e proxectos desenvolvidos ao longo do ano, compartindo resultados, novas propostas e retos de futuro para seguir facendo medrar o destino. Ademais, renderase homenaxe ás mulleres do territorio, recoñecendo o labor do colectivo das palilleiras, que elaborarán o agasallo que se entregará ao ou á embaixador/a desta edición.
Un evento cada vez máis asentado
O Encontro Anual de Turismo da Costa da Morte ten como obxectivo ser un punto de encontro dos axentes públicos e privados do territorio, que traballan cada día para mellorar o destino turístico da Costa da Morte. A andadura deste encontro comezou no ano 2021 no Parador Costa da Morte, en Muxía. As seguintes edicións foron en Costa Caión (Caión, A Laracha), na Torre de Laxe (Laxe) e no Pazo de Trasariz (Vimianzo). Nesta quinta edición tamén se fará entrega do III Premio Embaixador/a Costa da Morte, recoñecemento á traxectoria e compromiso coa promoción da comarca. A persoa elixida sumarase así a Bieito Romero, membro fundador do grupo Luar na Lubre, e a Jorge Mira, catedrático de Física Aplicada da USC, distinguidos nas dúas primeiras edicións do galardón.
