A nova Xunta Directiva da Costa da Morte Asociación Turística (CMAT) celebrou onte a súa primeira reunión na localidade da Laracha, actual sede da presidencia, co alcalde anfitrión, José Manuel López Varela, á fronte. O encontro tivo como obxectivo principal facer balance do estado actual da entidade e repasar as actividades que se están a desenvolver ao longo deste ano 2025.
Durante a reunión, a nova directiva estableceu tamén as liñas estratéxicas de traballo que guiarán a súa acción nos vindeiros meses. Marcáronse como obxectivos: reforzar a colaboración institucional e co tecido socioeconómico, fomentar proxectos de turismo sostible, mellorar a comunicación e apoiar iniciativas que dean visibilidade á riqueza cultural, patrimonial e natural da zona.
A CMAT subliñou a importancia de garantir a estabilidade e continuidade do proxecto iniciado nos últimos anos, consolidando as alianzas existentes e abrindo novas vías de colaboración con institucións, empresas e asociacións. O traballo en rede e a cooperación cos distintos axentes territoriais foron identificados como factores clave para afrontar con éxito os retos de futuro e para posicionar a Costa da Morte como un destino turístico de calidade.
Este primeiro encontro simboliza a vontade compartida de seguir sumando esforzos en beneficio do territorio, afianzando o compromiso coa súa promoción, preservación e desenvolvemento sostible.
