A CMAT – Costa da Morte Asociación de Turismo promoverá a colaboración entre os centros educativos e os distintos axentes vinculados á pesca artesanal para desenvolver o proxecto «Cartografía do mar: patrimonio, produto local e pesca artesanal na Costa da Morte». A iniciativa parte dunha idea fundamental: para coñecer e valorar os produtos do mar é necesario achegarse tamén ás persoas, aos espazos e aos oficios que fan posible a actividade pesqueira.
Para iso, a entidade establecerá contacto cos centros educativos, lonxas, confrarías, mercados e peixerías do ámbito de actuación do proxecto, integrado polos concellos de Dumbría, Cee, Corcubión, Fisterra e Carnota. O obxectivo é facilitar a coordinación entre os diferentes axentes, fomentar o traballo en rede e contar coa súa implicación nas accións educativas e divulgativas que se desenvolverán ao longo do proxecto.
Unha das principais liñas de colaboración será a creación e posterior implantación dunha unidade didáctica dixital dirixida ao primeiro ciclo de Educación Primaria. A través deste recurso, o alumnado poderá descubrir os recursos pesqueiros locais, as artes de pesca tradicionais, a estacionalidade das especies e a importancia da pesca sostible e do consumo responsable. A participación e o coñecemento dos profesionais do sector contribuirán a achegar estes contidos á realidade cotiá das comunidades costeiras.
O traballo conxunto terá tamén continuidade a través dun programa de visitas guiadas polas lonxas, mercados e espazos relacionados cos oficios do mar. Estas actividades permitirán coñecer como funciona a cadea de comercialización dos produtos pesqueiros, descubrir os distintos traballos vinculados ao sector e comprender a importancia da actividade artesanal para a economía e a identidade do territorio.
Por outra banda, lonxas, mercados e peixerías serán aliados fundamentais na campaña de promoción do consumo de produto mariñeiro local. A través desta colaboración buscarase dar visibilidade á diversidade dos recursos pesqueiros, á súa estacionalidade, ás súas características e ao seu valor gastronómico e nutricional, favorecendo hábitos de consumo máis conscientes.
A CMAT aposta así por unha iniciativa construída desde o propio territorio, na que a colaboración entre o ámbito educativo e o sector pesqueiro permita transmitir ás novas xeracións o valor dos recursos mariños e reforzar o recoñecemento social dos profesionais que traballan no mar.
Este proxecto está promovido pola CMAT – Costa da Morte Asociación de Turismo, «Cartografía do mar: patrimonio, produto local e pesca artesanal na Costa da Morte», e financiado pola Consellería do Mar e o Fondo Europeo Marítimo, de Pesca e de Acuicultura (FEMPA), a través das axudas xestionadas polo GALP Seo de Fisterra Ría de Muros Noia Costa Sostible.
