A CMAT – Costa da Morte Asociación de Turismo desenvolverá unha unidade didáctica dixital dirixida ao alumnado do primeiro ciclo de Educación Primaria, co obxectivo de achegar aos máis pequenos os recursos pesqueiros da Costa da Morte e dar a coñecer a importancia da pesca artesanal e dos produtos do mar de proximidade.
A iniciativa enmárcase no proxecto «Cartografía do mar: patrimonio, produto local e pesca artesanal na Costa da Morte», que aposta pola divulgación do patrimonio mariñeiro e pola promoción dun consumo máis consciente e responsable dos produtos pesqueiros locais.
A unidade estará adaptada ao currículo educativo e presentará os contidos dun xeito visual, atractivo e axeitado á idade do alumnado. Entre os temas que se abordarán figuran a importancia da pesca sostible e do consumo responsable, as artes de pesca tradicionais, a estacionalidade das especies e a identificación dos principais recursos pesqueiros da Costa da Morte. Tamén se explicará o proceso de etiquetaxe e venda dos produtos mariñeiros, achegando aos nenos e nenas información sobre a súa orixe e comercialización.
Para facilitar a aprendizaxe, o recurso combinará ilustracións, imaxes, vídeos e ligazóns de interese con actividades interactivas e xogos educativos que permitan reforzar os contidos e favorecer a participación do alumnado. Unha vez elaborado, estará dispoñible na páxina web da CMAT como ferramenta educativa e divulgativa.
Con esta actuación, a CMAT quere contribuír a que as novas xeracións coñezan mellor o mar e os seus recursos, identifiquen as especies propias do territorio e comprendan o valor da pesca artesanal, tanto desde o punto de vista económico como cultural e ambiental.
Este proxecto está promovido pola CMAT – Costa da Morte Asociación de Turismo, «Cartografía do mar: patrimonio, produto local e pesca artesanal na Costa da Morte», e financiado pola Consellería do Mar e o Fondo Europeo Marítimo, de Pesca e de Acuicultura (FEMPA), a través das axudas xestionadas polo GALP Seo de Fisterra Ría de Muros Noia Costa Sostible.
