Ao sur da ría na que o Anllóns entrega a colleita hídrica que foi recadando ao longo do seu camiñar por terras bergantiñáns, sitúase a vila histórica de Laxe, ao pé dunha extensa praia de fina area branca. As boas condicións naturais desta enseada contribuíron a que nela se fundase na Idade Media a localidade costeira e fose lugar atractivo para a familia nobre dos Moscoso.
Algúns autores fan referencia ás boas condicións deste porto para a actividade pesqueira e a recalada de embarcacións. O ilustrado José Cornide infórmanos de que a localidade era frecuentada por pescadores de todas partes, especialmente por cataláns que pescaban sardiña para despois exportar a outras zonas de fóra de Galicia.
A comezos do século XX chegou a haber ata cinco factorías de salgadura neste porto que empregaban fundamentalmente a mulleres. Tamén contribuíu ao desenvolvemento económico a mina de caolín situada a carón da praia. Actualmente Laxe vive fundamentalmente da pesca e do turismo.
Entre os seus persoeiros ilustres destacaron o poeta Antón Zapata García, o insigne xeólogo Isidro Parga Pondal e fundador do Laboratorio Xeolóxico de Laxe e o fotógrafo José Vidal García.
O viaxeiro que se achegue a Laxe dispón dun interesante patrimonio natural e histórico para visitar. No centro da vila, na praza de Ramón Juega, sitúase a Casa do Arco, o edificio civil máis emblemático, mandado construír por dona Urraca de Moscoso e o seu marido Pedro de Osorio a finais do século XV.
Moi próximo a esta praza localízase o Museo do Mar. O seu contido céntrase no patrimonio histórico e antropolóxico do concello e da vila de Laxe. Tamén acolle o Arquivo Fotográfico Vidal, ao que pertencen á maioría das imaxes que se expoñen.
O seguinte edificio histórico a visitar sería a igrexa de Santa María da Atalaia, situada nun lugar elevado desde o que se domina o porto, a extensa praia e parte do núcleo urbano. Trátase dun templo gótico mandado construír por Juana de Castro e Lara cara a finais do século XV. Consta dunha soa nave e unha capela maior rectangular cuberta por unha bóveda de crucería. Arrimada ao muro sur construíuse a torre campanario de forma cadrada e aspecto defensivo. Na fachada destacan un rosetón e a porta rematada en arco apuntado. No interior cabe salientar as imaxes pétreas da patroa, de Santa Inés e o relevo da Resurrección.
Desde Laxe resulta interesante achegarse á punta da Insua, onde se sitúa o faro, polo seu atractivo paisaxístico e tamén á capela de Santa Rosa desde a que contemplamos unha magnífica panorámica da vila e da súa fermosa praia.
