Se hai algo que define a Costa da Morte, ademais das súas paisaxes salvaxes e o seu mar indomable, é a súa forte identidade cultural. Ao longo do ano, esta terra mariñeira énchese de celebracións que mesturan historia, tradición e un profundo respecto polas súas raíces. Desde romarías ancestrais ata festivais culturais, cada evento é unha oportunidade para mergullarse na esencia máis auténtica de Galicia.
Se queres coñecer a Costa da Morte dunha forma diferente, contámosche algunhas das súas festividades máis emblemáticas. Prepara o calendario e ven vivilas en primeira persoa!
Festas tradicionais na Costa da Morte
En Galicia, a relixión e a tradición entrelázanse dun xeito único, e na Costa da Morte celébranse algunhas das festividades máis singulares do noroeste peninsular.
Mostra do Encaixe de Camariñas
📅 Semana Santa
Moito máis que un evento, é unha explosión de creatividade, tradición e moda. É o evento de encaixe máis importante do mundo, con máis de 30 anos de historia. Reúne artesáns de Galicia, España e outras partes do mundo. Inclúe unha pasarela de moda vangardista e diferentes postos onde descubrir esta arte tradicional.
Romería da Virxe da Barca (Muxía)
📅 Segundo domingo de setembro (se coincide o 8, pásase ao 15)
É unha das romarías máis importantes de Galicia e atrae a miles de peregrinos e visitantes. En Muxía, xunto ao Santuario da Virxe da Barca, a devoción cristiá mestúrase con antigas crenzas pagás. Segundo a lenda, a Virxe chegou a este lugar nunha barca de pedra para animar ao Apóstolo Santiago na súa evanxelización.
A contorna é impresionante: o mar batendo contra as rochas, o santuario no alto do cantil e os ritos tradicionais, como o de pasar baixo a Pedra dos Cadrís, que segundo a crenza popular ten propiedades curativas.
Festas do Carme: homenaxe aos mariñeiros
📅 16 de xullo
O mar é o corazón da Costa da Morte, e as Festas do Carme, patroa dos mariñeiros, é unha das celebracións máis agardadas nas vilas costeiras. En localidades como Malpica, Camariñas ou Laxe, as procesións marítimas son o punto culminante da festividade.
Barcos engalanados percorren o mar en honra á Virxe do Carme, nunha imaxe que emociona tanto a locais como a visitantes.
Carballeira de Zas: festa folk
📅 Segundo fin de semana de agosto
A música folk é unha parte fundamental da cultura galega e celta, e poucos lugares permiten descubrir a súa diversidade e carisma como a Carballeira de Zas. Durante dous días de festival, poderás escoitar grupos de folk consagrados xunto a novos talentos, todo nunha contorna única: a Carballeira, un espazo natural cheo de maxia.
Asalto ao Castelo de Vimianzo
📅 Primeiro sábado de xullo
No ano 1468 tivo lugar en Galicia o que popularmente se coñece como a revolta irmandiña, unha rebelión do pobo contra os señores feudais. Este fito histórico é homenaxeado cada ano en Vimianzo coa festa medieval do Asalto ao Castelo.
Poderás percorrer as rúas da vila vestido de época, probar os pinchos irmandiños nos bares, descubrir produtos artesanais na feira medieval e, sobre todo, participar no asalto ao castelo, unha representación teatral onde poderás converterte nun revolucionario medieval. Todo isto acompañado de actuacións musicais de renome nacional e internacional.
Festiletras
📅 16 de xullo
A cultura e a Costa da Morte van da man. Esta relación está marcada pola tradición, pero tamén pola innovación no mundo das artes.
Un exemplo disto é o Festiletras, un festival que reúne os maiores expoñentes da música, literatura, artesanía, cine, teatro e cultura galega en xeral. Unha cita imprescindible para coñecer o potencial da cultura galega actual.
Festa do Percebe de Corme
📅 Primeiro sábado de xullo
O percebe é un dos produtos máis cobizados do mar de Galicia polo seu intenso sabor. E, sen dúbida, o lugar máis destacado para a súa captura é O Roncudo. Por iso, a festa gastronómica dedicada a este manxar celébrase en Corme.
Cada ano, a vila énchese de vida para unha gran degustación e unha verbena popular que celebra este tesouro do mar.
Romería de Santo Hadrián de Malpica
📅 16 de xuño
Conta a lenda que en Malpica había unha praga de serpes ata a chegada de Santo Hadrián, quen pisou unha delas e espantou ás demais, que fuxiron do lugar.
Hoxe en día, este suceso celébrase na Romaría de Santo Hadrián, onde os romeiros acompañan a imaxe do santo ata a ermida do século XVI no cabo de Santo Hadrián, cunhas vistas impresionantes das Illas Sisargas.
Mostra de Olería de Buño: artesanía tradicional
📅 Primeiro fin de semana de agosto
A olería de Buño é recoñecida a nivel mundial pola súa tradición e calidade. Non hai mellor lugar para descubrir este mundo fascinante que a Mostra da Olería de Buño.
Aquí poderás ver as creacións dos mellores oleiros, adquirilas ou mesmo aprender a facer as túas propias pezas nos obradoiros. Tamén hai concertos, espectáculos e concursos gastronómicos que enchen de vida a vila durante eses días.
Naufraxio de Laxe
📅 17 de agosto
A festa do “Naufraxio” é unha homenaxe da xente de Laxe á Virxe do Carme pola súa protección e axuda aos mariñeiros.
A súa orixe débese á figura de Avelino Lema Santos, mariñeiro supervivente de tres naufraxios, quen a impulsou desde o primeiro momento no ano 1962. Nela poderás asistir á representación do “Naufraxio”, na que uns mariñeiros naufragan no seu regreso tras un día de faena.
Tres deles logran chegar a terra, onde os espera a imaxe da Virxe do Carme. Porén, un cuarto non o consegue e terá que ser rescatado e posteriormente resucitado pola propia imaxe da Virxe, que obra o milagre.
Milagres de Caión
📅 8 de setembro
En Caión existe unha fonte cuxas augas son consideradas milagrosas. Dise que tanto ao bebela como ao mollaren panos nela para aplicalos nas zonas con dor poden axudar a curar.
Por este motivo, cada ano celébrase a “Romaría dos Milagres”, na que se realizan misas e procesións nas que os devotos agradecen os favores recibidos. Ademais, a romaría dos Milagres é tamén unha das verbenas máis populares da zona, á que acoden grandes orquestras para amenizar as noites.
Santo Cristo de Fisterra
📅 Semana Santa
Conta a lenda que un barco fronte ás costas de Fisterra non lograba avanzar ata que lanzou unha caixa ao mar. Esta caixa chegou a unha praia de Fisterra e, ao abrila, os pescadores descubriron a imaxe do Santo Cristo.
Dun xeito misterioso, a figura decidiu que este era o lugar onde debía permanecer e, desde entón, nunca abandonou a localidade. Cada Semana Santa celébrase a festa do Santo Cristo, na que poderás presenciar e participar na representación dos distintos momentos da paixón de Cristo: desde a peregrinación do Santísimo Cristo e a procesión da entrada triunfal en Xerusalén, ata a procesión do Santo Enterro e a escenificación da resurrección.
Todo isto mentres asistes ás misas e ofrendas que complementan as escenificacións e ritos. Pero non todo ten relación coa relixión, pois tamén hai espazos para gozar da verbena nocturna coas súas orquestras e bailes.
Feira Medieval de Corcubión
📅 Último fin de semana de julio
A “Feira Medieval de Corcubión” é unha viaxe ao pasado na que poderás vivir de xeito pleno uns días na Idade Media. As rúas de Corcubión son o escenario perfecto para mergullarte en exhibicións de cetraría e loitas medievais, pequenos concertos de trobadores con instrumentos de época, malabaristas, bailes e moitas outras actividades que che farán sentir como se viaxases no tempo.
Ademais, terás a oportunidade de adquirir recordos desta experiencia no mercado medieval, onde atoparás produtos artesanais inspirados na época.
Festa da Praia de Dumbría
📅 Primera fin de semana de agosto
A “Festa da Praia do Ézaro” propón un día de mar e area único para toda a familia. Os máis pequenos poderán gozar de obradoiros infantís de manualidades, xogos de habilidade e inchables. Pero tamén haberá espazo para os adultos, con actuacións musicais, unha gran sardiñada e o tradicional pasarrúas.
Para os máis aventureiros, celébrase a espectacular proba de obstáculos OCR Praia do Ézaro.
Xunqueira de Cee
📅 15 y 16 de agosto
Segundo a lenda, a Virxe da Xunqueira apareceu entre uns xuncos e, nese preciso lugar, construíuse un santuario que deu orixe á actual vila de Cee. Así, cada 15 e 16 de agosto, este lugar vístese de gala para celebrar a súa efeméride fundacional con tradicionais oficios relixiosos e a procesión da Xunqueira.
Pero esta celebración vai máis aló do aspecto relixioso, pois inclúe unha gran inauguración das festas con personaxes famosos, verbenas, festas infantís, fogos artificiais desde a praia da Concha e un gran concerto final.
Festa da Pataca de Coristanco
📅 14 y 15 de setembro
A pataca de Coristanco é unha das mellores do mundo e, como non podía ser doutro xeito, ten a súa propia festa gastronómica para renderlle homenaxe a este excelente produto e ao traballo dos seus agricultores.
Nesta celebración poderás asistir e participar nunha infinidade de actividades e espectáculos, como:
- Exposición de maquinaria agrícola
- Concurso de figuras feitas con patacas
- Actividades tradicionais como o concurso de trullo e de apañar patacas
- Concurso de tortillas con pataca de Coristanco
Todo isto acompañado de actuacións e concertos que amenizan estas xornadas de festa.
Conclusión: Vive a Costa da Morte a través das súas tradicións
Estas son só algunhas das moitas festas que se celebran na Costa da Morte ao longo do ano. Na nosa web podes consultar todas as festividades dispoñibles.
As celebracións da Costa da Morte son unha forma perfecta de descubrir a esencia deste territorio, combinando historia, gastronomía e cultura popular. Atrévete a vivilas!
