A Costa da Morte, como é de esperar, é terra de actividades ao aire libre. Especialmente acuáticas. Aínda que é certo que a aparición das actividades acuáticas é relativamente recente e que, en xeral, os locais sempre viron o mar como un medio para gañarse a vida ou como algo ao que terlle medo.
Cada vez son máis os que se aventuran a entrar no océano para pillar ondas ou explorar as profundidades. Anímaste tamén ti?
Surf e kitesurf na Costa da Morte
A Costa da Morte non destaca polo seu mar en calma. E isto atraeu nas últimas décadas a moitos amantes do surf. É certo que a maioría das súas praias son para surfistas experimentados.
Sen embargo, tamén hai cabida aquí para aqueles que queren iniciarse neste deporte e existen escolas con clases adaptadas en Razo (Carballo), Malpica de Bergantiños e Nemiña (Muxía). Alí facilitaránche o material, aconséllanche sobre o mellor día para probar e acompañaranche en todo momento.
Se xa tes máis experiencia, esas mesmas praias tamén poden estar moi ben para practicar surf. E algúns dos lugares máis famosos para facer kitesurf son os de Traba ou Soesto no Concello de Laxe.
Submarinismo na Costa da Morte
Coller unha bombona de oxíxeno e aventurarse a descubrir as profundidades do Océano Atlántico pode soar aterrador para algúns, pero emocionante para outros. Se es dos segundos, o submarinismo na Costa da Morte está feito para ti.
Pódese reservar esta actividade tanto en Malpica de Bergantiños como en Fisterra, onde xa desde a primeira inmersión se pode mergullarse ata barcos afundidos, que dan nome a este territorio.
Se che apetece ver un pouco máis da vida submarina, pero sen adentrarte nas profundidades do océano, en moitas das praias pódese ver con facilidade vida mariña facendo snorkel. Consigue unhas simples gafas e tubo e a gozar!
Paddlesurf na Costa da Morte
Se todo o anterior soa demasiado extremo, animámosche a facer algunha actividade na súa versión relax. Hai praias nas que podes reservar unha paddleboard e divertirte un rato en augas tranquilas. Que as hai! Non todas as praias son salvaxes, senón que existen moitas outras ao abrigo da ría onde, aínda que haxa que estar atento, poderás gozar con tranquilidade.
Kayak na Costa da Morte
Ao longo do territorio atoparás diferentes lugares onde alugar kayaks, tendo así a posibilidade de facer rutas moi diversas.
Unha delas é o Estuario do Río Anllóns, no Concello de Ponteceso. Deste xeito, poderás descubrir os encantos desta zona remando sobre a túa propia embarcación. É unha escusa perfecta para pasar un bo rato mentres sigues descubrindo as marabillas que Costa da Morte ten para ofrecer. Esta zona é moi especial pola súa fauna, especialmente as aves.
No sur de Costa da Morte, hai máis aventuras en kayak agardándote. Poderás chegar ata a mesma Cascada do Ézaro remando e saír ao mar aberto. Se es o suficientemente aventureiro, poderás incluso chegar ás Illas Lobeiras. Un pequeno arquipélago na ría de Corcubión con moita maxia.
Senderismo en Costa da Morte
Tamén existe a posibilidade de que sexas un animal de secano e non che interese para nada a auga. Non te preocupes, tamén hai opcións para ti. Desde rutas duras a outras moito máis fáciles. Sexa cal for a túa forma física e as gañas que teñas, haberá unha para ti. Aquí deixámosche un enlace a un artigo no que facemos un análise máis detallado das mellores rutas de sendeirismo de Costa da Morte.
Agardamos que este artigo che inspirase a coller a túa mochila e achegarte á Costa da Morte para gozar de actividades ao aire libre nesta tempada. Que non é só no verán! Aquí desfrutamos de estar ao aire libre os doce meses do ano e estás convidado a facelo con nós tamén. Agardámoste!
Se decides facer algunha destas actividades e subes fotos a Instagram, etiquétnos na conta @visitacostadamorte onde tamén te podes deixar inspirar por quen xa sentiu a maxia deste espazo antes.
