Se te preguntas que facer unha fin de semana na Costa da Morte, aquí traémosche un itinerario perfecto para descubrir este cachiño de costa galega.
Costa da Morte é o destino ideal para unha escapada de fin de semana. As súas paisaxes cheas de cantís, faros e vilas mariñeiras ofrecen unha experiencia única, onde a tradición e a natureza se entrelazan para crear recordos inesquecibles.
Se nos preguntamos que podemos facer en dous días, as repostas son moitas pero hai unha mensaxe clara: dous días quedaránseche curtos. Así que hoxe darémosche un plan para visitar velozmente todo o territorio, pero aconsellámosche que volvas con, polo menos, dez días. Neste outro artigo atoparás un itinerario máis pausado e completo.
Pero agora, imos ver como sacar o máximo partido de Costa da Morte en tan só unha fin de semana. A intención é que teñas a sensación de que chegaches a coñecer este territorio. Pero podemos asegurar que, ao mesmo tempo, quedarás con ganas de volver.
Venres pola tarde: chegando á zona
Imos facer o itinerario chegando polo norte, pero aconsellámosche que o adaptes á zona pola que ti entres ao territorio. O certo é que para poder gozar de todos os recunchos que Costa da Morte ten para ofrecer vas ter que desprazarche no teu propio coche. Non teñas medo de facer moitos quilómetros, xa que o relevo fai que os puntos parezan próximos. Pero a verdade é que o territorio é moi amplo e todo está relativamente lonxe.
O venres pola tarde aconsellámosche que che achegues a Caión, no Concello da Laracha para ver o que che deparará a fin de semana: mar e vilas con encanto. Isto é só o aperitivo. Mañá serán moitos máis.
Para a noite, recomendámosche ir cara ao interior. En Carballo verás as paredes dos edificios cheas de murais, de arte urbana. Aquí atoparás moita oferta tanto gastronómica como cultural.
Sábado: descubrindo o encanto das vilas costeiras
A uns quince minutos de Carballo está Malpica de Bergantiños, unha pintoresco vila mariñeira. Goza dun paseo polo porto e verás de primeira man como chegan a terra os produtos frescos do mar dos que poderás gozar toda a fin de semana no teu prato.
Déixache caer tamén polo paseo marítimo con vistas ao mar aberto. Nesta praia, poderás ver a xente surfear. Anímate a reservar unha clase de surf para vivir a experiencia completa!
A uns vinte minutos, atoparás o Faro Roncudo en Corme, no Concello de Ponteceso. Este lugar é famoso por ser unha das zonas máis perigosas para os percebeiros, quen arriscan a súa vida colleitando este prezado produto nos cantís.
A vista ao mar desde o faro é impresionante.
Alén da ría atópase Laxe. Alí poderás gozar da súa fermosa praia de area branca e augas cristalinas. Nesta vila poderás atopar a curiosa Praia dos Cristais, onde en lugar de area atoparás pequenos vidros erosionados polo océano.
Dá un paseo polo paseo marítimo e visita a Igrexa de Santa María dá Atalaia, exemplo do gótico mariñeiro dalgunhas igrexas do litoral galego.
Remata o día ceando nalgún dos restaurantes da zona, onde poderás degustar mariscos frescos e pratos típicos como o polbo ou a empanada de zamburiñas.
Domingo: natureza e cultura
Animámoste a empezar o domingo na fronteira sur. Arrinca o teu día cunha dose de aventura ascendendo ao Monte Pindo no Concello de Carnota, coñecido como o “Olimpo Celta”. A subida levarache unhas tres horas, pero as vistas desde o cumio, con panorámicas da costa e as rías, valen cada paso.
Tras esta camiñada, recomendámosche visitar a Fervenza do Ézaro no Concello de Dumbría, onde o río Xallas se atopa co Océano Atlántico, creando unha fervenza única en Europa.
Non lonxe de alí atoparás outras fervenzas máis pequenas, pero igualmente moi bonitas no Concello de Mazaricos. Unha das máis destacadas é a Fervenza de Noveira.
O punto culminante da túa fin de semana debe ser a visita ao Faro de Fisterra, o fin do mundo coñecido na antigüidade. Pasea polos cantís mentres o sol afúndese no horizonte, pintando o ceo con tons dourados e laranxas. É unha experiencia que encapsula a maxia de Costa da Morte.
Para rematar a túa fin de semana, goza dunha cea en Fisterra ou desprázate ata Muxía. Busca un restaurante onde se escoite o mar. O turismo gastronómico combinado co acústico pode facer da túa cea un momento máxico. Proba a pescada á galega ou unha caldeirada de peixe e brinda cun bo viño pola experiencia vivida.
Descubre Costa da Morte: unha fin de semana inesquecible
Costa da Morte é un destino que combina historia, natureza e cultura dunha maneira única. Nunha fin de semana, podes gozar das súas paisaxes, sentir a bravura do Atlántico e mergullarte nas lendas que envolven as súas vilas. Se buscas un lugar onde a natureza aínda conserva o seu lado máis salvaxe e auténtico, esta costa galega espérate cos brazos abertos.
É certo, como che indicabamos ao comezo, que dous días e medio pódense facer realmente curtos. Din que “o bo se breve, dúas veces bo”. A verdade é que non estamos completamente de acordo e consideramos que se podes volver ou alongalo será dobremente bo.
Pero, tamén estamos convencidos que mellor poder visitar Costa da Morte nunha fin de semana, que non gozala.
Así que esperamos que este artigo che servise de axuda e que che deixes namorar por este territorio con tanto que ofrecer. Se visitas este territorio e subes fotos a Instagram, etiquétanos na conta @visitacostadamorte onde tamén te podes deixar inspirar por quen xa sentiu a maxia deste espazo antes.
