Hai territorios que non se entenden cun “top 10”. Territorios que precisan tempo, contexto e mirada. A Costa da Morte é un deles: un lugar onde o Atlántico marca o carácter, onde cada faro ten a súa historia e onde a identidade se recoñece na maneira de vivir e de acoller. Por iso, desde hoxe arrancamos en visitacostadamorte.com unha serie moi especial: unha colección de artigos que iremos publicando capítulo a capítulo, para descubrir o xeodestino con calma e con profundidade.
Esta serie forma parte do libro “Costa da Morte, Naturalmente Única”, con textos de Xan Fernández Carrera e fotografías de Antonio Fernández. Unha obra pensada para poñer en valor e ordenar os recursos turísticos da Costa da Morte, reforzando a colaboración entre administracións, profesionais do turismo e tecido asociativo, e lembrándonos algo esencial: que este destino se entende mellor cando se narra desde dentro, con respecto e con orgullo.
Detrás desta iniciativa está a Asociación de Profesionais do Sector Turístico da Costa da Morte (APTCM), que a impulsa como parte dunha estratexia ambiciosa de contidos e dixitalización. É xusto nomear a quen foi un gran motor deste camiño: Pepe Formoso, presidente da APTCM, gran valedor dunha visión que aposta por contido propio, coidado e con identidade, e que está axudando a situar a Costa da Morte nun chanzo superior na súa proxección como destino.
E nesa mesma liña de apoio institucional continuado, esta estratexia contou tamén co respaldo de Xosé Manuel Merelles, director de Turismo de Galicia, que acompañou e impulsou este enfoque xunto a Pepe Formoso, entendendo a importancia de construír produtos turísticos ben narrados, coherentes e conectados co carácter real do xeodestino.
A publicación —promovida pola APTCM, socia da CMAT en representación do sector privado— desenvolveuse grazas ao apoio financeiro da Xunta de Galicia e percorre, en galego, castelán e inglés, a riqueza paisaxística, cultural e patrimonial dos 17 concellos do xeodestino. Faros e cantís, vilas mariñeiras, camiños históricos, tradicións vivas, praias abertas ao océano e espazos naturais únicos: cada capítulo invita a mirar o mapa doutra maneira, con máis contexto e con máis emoción.
Ademais, dentro deste mesmo proxecto, impulsouse a dixitalización completa do libro, e esta serie nace precisamente para trasladar ese contido á web de forma ordenada, accesible e útil. Un paso clave para que visitacostadamorte.com sexa cada vez máis unha referencia dun destino sostible, ben narrado e con voz propia, onde cada visita á páxina sexa tamén unha pequena viaxe.
E para que ninguén perda o fío do percorrido, cada novo capítulo publicarase na web e compartiráse tamén nas redes sociais da CMAT, convidándote a seguir a serie, gardala e volver a ela cando esteas preparando a túa próxima escapada —ou cando simplemente che apeteza asomarte á Costa da Morte desde a casa—.
Benvido/a a Costa da Morte, Naturalmente Única. Desde hoxe, comezamos a viaxe.
