Pregúntaste que festas gastronómicas hai na Costa da Morte? Aquí traemos a selección completa!
A gastronomía é un pilar fundamental na cultura galega e Costa da Morte non ía ser unha excepción á hora de celebralo. Son moitas as festas que se celebran ao longo de todo o ano en honra a un alimento concreto ou a unha receita en xeral.
Queres coñecelas? Segue lendo!
Festa da Filloa, Loroño, Zas
Celebrase o último sábado de febreiro.
Este produto tradicional, tan típico da época de entroido, ten a súa propia festa. Pódese degustar tanto salgado como doce.
Festa do Bolo do Pote, A Picota, Mazaricos
Celébrase o primeiro fin de semana de marzo.
Grazas a esta festa recuperouse un produto tradicional: o bolo do pote. Nesta festa poderás degustar estes bolos feitos de fariña de millo e centeo que se acompañan de chourizo e touciño.
Festa do Cocido Galego en San Mamede, Carnota
Celébrase o terceiro sábado de marzo.
Degústase cocido galego, así como outros pratos típicos como orella, empanada ou filloas.
Festa do Congro, Muxía
Celébrase o venres santo.
O congrio é un dos produtos máis típicos de Muxía, onde podemos atopar os seus característicos secadeiros. Este día poderase degustar este peixe de moitas maneiras e gozar do bo ambiente no pobo.
Festa do Raxo, Brantuas, Ponteceso
Celébrase o primeiro sábado de xuño.
Esta festa comeza cunha misa solemne e continúa cun baile e música tradicional. Despois, xa se entra na degustación de raxo.
Festa do Percebe, Corme, Ponteceso
Celébrase o primeiro sábado de xullo.
O percebe é un dos produtos máis renomados do océano e os do Roncudo levan a mellor fama. Por iso, cada ano, Corme celebra unha gran festa para degustar o seu ben máis prezado.
Feira das Cereixas, Paiosaco, A Laracha
Celébrase o primeiro domingo do mes de xullo.
Hai décadas, a produción de cereixas tiña unha gran importancia na zona e esta festa segue viva para recordalo. Esta feira naceu para vender esas cereixas que xa empezaban a estar maduras.
Actualmente, mantense a festa para celebrar con máis cultura e goce.
Faguía, Carnés, Vimianzo
Celébrase cada 9 de xullo.
Esta é unha das festas gastronómicas máis antigas de Galicia. Está dedicada aos callos. Prepárase unha gran cantidade deste prato e séguese degustando. Aproveitase para celebrar con música durante os días seguintes.
Festa do Longueirón, Fisterra
Celébrase o primeiro fin de semana de agosto.
A praia de Langosteira destaca á hora de conseguir moito longueirón e fixeron unha festa para celebralo. Degústase este marisco e aproveítase tamén para celebrar o Encontro Pirata. Todo isto con moita música e bo ambiente.
Festa do Pichorro, Cances, Carballo
Celébrase a segunda quincena de agosto.
É unha festa de recente creación na que se degusta, con pementos e cachelos, o “pichorro”, que é millo antes de madurar.
Festa do Berberecho en Baldaio, Carballo
Celébrase o terceiro sábado de agosto.
O berberecho é un marisco moi ben prezado, como todos os que se recollen na Costa da Morte e en Baldaio teñen unha festa en seu honor. Hai degustación de berberechos con diferentes receitas. A música non faltará!
Festa do Porco ao espeto, Cabana de Bergantiños
Celébrase o primeiro venres de setembro.
Na parroquia de O Esto, xúntase toda a comarca para gozar de racións e boa música.
Festa da Pataca, Coristanco
Celébrase o segundo fin de semana de setembro.
As patacas da zona teñen fama mundial e, por iso, contan coa súa propia festa. Realízanse moitas actividades en relación a este alimento: exposición de maquinaria agrícola, concurso de figuras con pataca, actividades da terra ou o concurso de tortas con pataca de Coristanco. Todo acompañado de actuacións e concertos.
Festa gastronómica de Soandres, A Laracha
Celébrase o segundo fin de semana de outubro.
Nesta festa bótase man dunha boa comida en xeral. É unha escusa para celebrar sen ter un alimento concreto no foco.
Feira das Fabas, Ponteceso
Celébrase o último sábado de outubro.
A finais de setembro e no mes de outubro é a época da colleita das fabas. Por iso, comezan os festexos en seu honor. Nesta “Feira das Fabas” pódese degustar fabada e gozar da música e outras actividades.
Festa da Fabada, Paiosaco, A Laracha
Celébrase o cuarto domingo de outubro.
Nesta festa non pode faltar a degustación da fabada.
E aquí conclúe a lista de festas gastronómicas da Costa da Morte, nas que probablemente falten algúns nomes. Déixate encandilar polas festas gastronómicas da zona e mantente atento á nosa axenda, onde publicamos todos os eventos que hai no noso territorio e os seus horarios.
Se vas a algunha destas festas, non esquezas etiquetarnos na nosa conta de Instagram @visitacostadamorte
