O núcleo de Corme Porto debe a súa orixe ás boas condicións da enseada na que se sitúa o seu porto que permitía o aproveitamento dos recursos marítimos dos que vivía a súa poboación. Anterior a este núcleo costeiro foi a parroquia de Santo Hadrián situada máis ao interior, en Corme Aldea, á que pertenceu esa vila costeira.
No mapa do portugués Pedro Teixeira (1634) aparecen debuxados os dous núcleos. Corme Porto vese ao pé dunha extensa praia con varias embarcacións debuxadas, o que indica a importancia que tiña naquela época, e en Corme Aldea represéntase a igrexa parroquial de Santo Hadrián.
O ilustrado José Cornide, cando se refire a este porto, ademais de destacar as excelentes condicións que presentaba para o atraque de embarcacións, tamén nos transmite a noticia da presenza dos cataláns na localidade, dedicados á pesca e salgadura de sardiña.
Polos anos vinte do século pasado, Corme ocupaba un lugar destacado entre os portos galegos pola súa frota dedicada ao transporte marítimo de cabotaxe, formada por máis de corenta barcos que frecuentaban os portos peninsulares, moitos deles cargados de madeira procedente dos piñeirais bergantiñáns.
O Corme desta época era unha vila dinámica no económico e social. Dispoñía de varias factorías de salgadura, tarrafas de vapor para a pesca e tres secadoiros de congro. O seu casarío tiña o típico aspecto dunha vila mariñeira. Esta paisaxe urbana tradicional mudou por completo a partir dos anos setenta, cando se impuxeron as novas construcións. Na actualidade a vila segue a vivir dos recursos do mar como a pesca ou o marisqueo e do turismo, aínda que a súa frota pesqueira cada vez vese máis reducida.
Tanto a vila cormelá como a punta do Roncudo, son coñecidas pola sona que lle deu o percebe, marisco moi valorado, que medra en abundancia nas rochas dese saínte costeiro batidas por un mar axitado.
A fama dos percebes do Roncudo xa vén de antigo. O escritor Carré Aldao destacaba xa a calidade destes crustáceos mariños nesta zona costeira: “Punta del Roncudo, en la que se crían excelentes y grandes percebes, de los más sabrosos de todo el litoral”.
Na primeira quincena de xullo desde o ano 1992 celébrase a Festa do Percebe, un evento moi concorrido, no que, ademais da degustación dese marisco, hai atraccións musicais e lúdicas ao longo do día.
A punta do Roncudo sitúase a uns tres quilómetros do porto cormelán, un lugar de recomendable visita para calquera viaxeiro que se achegue a Corme. A ruta ofrece espectaculares vistas sobre a outra banda da ría: vila de Laxe, praia e penedos de Traba, costa de Camelle e Arou e cabo Tosto. Unha vez chegado ao final da estrada, espertarán o interese do viaxeiro, o mar que bate con forza contra os cantís, o faro e as cruces pintadas de branco que vemos enriba dalgúns penedos, lembranza de percebeiros que foron arrastrados polo mar mentres extraían ese prezado marisco.
