Desde a punta de Caldebarcos, ao norte, ata a punta dos Remedios, ao sur, fórmase un gran arco areento costeiro, como consecuencia da chegada ao mar das terras baixas do val de Carnota. Un arco de area branca produto dos diminutos grans de seixo e dos restos de cunchas de bivalvos. Un areal de case sete quilómetros de lonxitude considerado como a praia máis longa de Galicia, con distintas denominacións segundo os lugares próximos: praia de Caldebarcos, de San Mamede, de Carnota, do Cancelo e do Mar de Lira. A fauna que máis abunda nesta parte areenta son as gaivotas e o grupo das limícolas.
Paralelo a este arco formouse un cordón de dunas que dificultou á saída ao mar da auga dos regatos que veñen desembocar a este treito costeiro, como o rego de Pedrafigueira, obrigado a desviar o seu curso cara ao norte, uníndose ao río Vadebois, antes da desembocadura na Boca do Río. Estas dunas formáronse polos ventos do noroeste, predominantes na zona. Acadan pouca altura e están escasamente colonizadas. Sobre elas medran plantas que son capaces de adaptarse a este tipo de solos tan áridos.
Detrás das dunas sitúanse as marismas, ao facilitar aquelas o encorado das augas fluviais. A zona de marisma está repartida en dúas partes: a de Caldebarcos ou Berberecheira, ao norte, e a denominada “Lagoa”, ao sur. De par de cada unha delas hai tamén unha lagoa. Na parte marismeña medran varias especies de plantas do grupo das xuncáceas, gramíneas ou salicornias. É onde hai unha maior concentración de aves pola posibilidade de conseguir alimento.
A Boca do Río denomínase así pola canle que comunica o río co mar e permite a entrada da auga salgada na lagoa e máis na marisma cando enche a marea e a súa saída cando devala. Debido ao movemento de gran masa de auga, fórmanse fortes correntes.
Nesta zona entre a area da praia intercálanse penedos que lle dan unha enorme fermosura á paisaxe. Nas proximidades consérvanse os restos dunha antiga construción denominada Casa do Sal, un antigo almacén no que se gardaban as mercadorías que chegaban en barco, entre elas, ese produto, que tivo tanta importancia en épocas pasadas. Tamén se sitúa a marisma e lagoa de Caldebarcos. Na baixamar queda ao descuberto unha gran chaira areenta coñecida entre a veciñanza como a Berberecheira, pola abundancia que había deste bivalvo. É un sitio moi axeitado para a observación de aves, sobre todo do grupo das anátidas e limícolas.
