O Encontro Anual de Turismo da Costa da Morte reafírmase como o principal foro de reunión dos axentes públicos e privados do sector turístico da comarca, cun dobre obxectivo: compartir os logros acadados e impulsar un crecemento sostible tanto económica como socialmente.
Un evento con identidade e traxectoria
Dende a súa primeira edición en 2021 (Parador de Costa da Morte, Muxía), pasando por Costa Caión (A Laracha, 2022), Torre de Laxe (2023) e o Pazo de Trasariz en Vimianzo (2024), este foro consolidouse como punto de encontro de referencia para os axentes públicos e privados que traballan polo destino Costa da Morte.
Requisitos das candidaturas
Os establecementos interesados en acoller o encontro deberán cumprir, cando menos, os seguintes requisitos:
- Estar situados na Costa da Morte.
- Ter capacidade mínima para 200 persoas.
- Experiencia acreditada na organización de eventos semellantes.
- Dispoñibilidade para a data e horario fixados.
- Servizos ou capacidade de xestión técnica (imaxen, son, mobiliario, catering, etc.).
O resto de requisitos e as características específicas do evento pódense consultar na web da CMAT a través da seguinte ligazón.
Presentación de candidaturas
Para os establecementos interesados, o prazo de presentación das candidaturas remata o 19 de setembro de 2025. A presentación da candidatura farase a través do envío deste anexo descargable que deberá ser enviado coa documentación complementaria que cada establecemento considere necesario e que poida axudar á CMAT a realizar as valoracións que estime oportunas ao seguinte correo electrónico: admincmat@visitacostadamorte.com. Unha vez recibidas, a CMAT avaliará as candidaturas e contactará cos aspirantes para analizar os aspectos técnicos e económicos, co obxectivo de seleccionar a sede máis axeitada. Neste sentido e na medida do posible, procurarase organizar o encontro nun concello que non acollera o evento previamente.
