Este martes celebrouse a Asemblea Xeral anual da CMAT no Auditorio do Centro Sociocultural de Baio (Zas), na que se aprobou por unanimidade a renovación da Xunta Directiva. A presidencia pasa agora ao alcalde da Laracha, respectando a rotación alfabética entre os concellos que compoñen a entidade. Tamén se incorporan á nova Xunta Directiva Margarita Lamela Louzán (Cee) como vicepresidenta, Francisco Javier Domínguez Traba (Corcubión) como secretario e Sandra Vilela Riveiro (Muxía) como tesoureira.
Pola súa banda, continúan como vogais os dous representantes da APTCM e María Lema (Dumbría), o que garante unha transición ordenada na xestión. A CMAT destaca que esta nova Xunta conta con representación dos distintos partidos políticos que gobernan actualmente no territorio, asegurando o equilibrio territorial que se promove desde a fundación da asociación, xunto coa representación do sector privado a través da APTCM. Ademais de dar a benvida ás novas incorporacións procedentes dos concellos que integran o xeodestino, presentouse un resumo das accións realizadas durante o pasado ano, revisáronse os obxectivos fundamentais, as fontes de financiamento e os fitos acadados nos últimos anos, así como a planificación para o 2025.
A Xunta saínte, liderada por Manuel Muiño, quixo destacar ao comezo da súa intervención “o orgullo polo equipo que o acompañou e a importancia de pasar pola presidencia e formar parte da Xunta Directiva para coñecer a realidade de todos os concellos que integran a Costa da Morte”, valorando a experiencia como moi grata e enriquecedora.
