A Costa da Morte Asociación Turística (CMAT) e a Asociación Profesional do sector Turístico da Costa da Morte (APTCM), acompañadas de Turismo de Galicia e da Deputación da Coruña, presentaron esta mañá no Parador da Costa da Morte a nova web oficial do destino. No evento tamén se presentou a dixitalización e tradución do emblemático libro de Xan Fernández Carrera, A Costa da Morte, Confín de Europa, así como a publicación da nova Guía de Artesanía na Costa da Morte.
O acto contou coa presenza de máis de 60 asistentes, entre eles representantes institucionais de todos os concellos socios, así como do ámbito turístico e cultural. A apertura oficial estivo a cargo de D. Manuel Muíño, presidente da CMAT e alcalde de Zas, quen agradeceu a todos os presentes que se achegaran ata Muxía.
A continuación, D. Pepe Formoso (APTCM) destacou a importancia do traballo conxunto de todos os socios deixando ao lado os individualismos, e o peso da nova web como escaparate principal do destino. Tamén presentou a dixitalización e tradución do libro A Costa da Morte, Confín de Europa, unha obra fundamental para comprender a identidade desta rexión atlántica.
A presentación institucional contou tamén coa intervención de D. Xosé Regueira, vicepresidente da Deputación da Coruña, quen destacou “a artesanía como valor propio do territorio” e animou a todos os artesáns a aproveitar as oportunidades vinculadas ao turismo para seguir medrando; e de D. Xosé Merelles, director da Axencia Turismo de Galicia, quen subliñou o importante crecemento que está a experimentar o sector turístico da Costa da Morte e recoñeceu a colaboración entre todas as institucións.
A vicepresidenta da CMAT, María Lema, tomou a palabra para recoñecer o traballo realizado cos artesáns e o elemento diferenciador que supón para o futuro do turismo na Costa da Morte.
Finalmente, D. Manuel Muíño presentou o traballo realizado para a nova páxina web (www.visitacostadamorte.com) xunto ás persoas responsables da súa execución —a empresa local WP Nordés—, e aproveitou para facer unha reflexión final do seu paso como presidente da CMAT antes do cambio de Xunta Directiva, agradecendo o traballo ao seu equipo e o apoio recibido tanto do sector privado grazas a APTCM como da administración provincial e autonómica.
