A natureza foi moi bondadosa coa Costa da Morte, deixándonos senlleiros monumentos naturais labrados co cicel da auga e do vento ao longo de millóns de anos, non temos máis que ver os conxuntos escultóricos dos penedos de Pasarela e Traba ou do Monte Pindo, e tamén obras individuais como a da Pedra do Brazal.
Atópase este singular penedo ao suroeste do monte Castelo de Logoso (402 m), cume que domina a paisaxe da contorna. Para chegar a el collemos a estrada que desde Anseán (Os Buxantes, Dumbría) leva ao lugar do Brazal, e desde aquí, continuamos polo camiño que conduce a este monumento natural. Tamén se pode chegar desde o lugar do Logoso (Olveira, Dumbría) ou tamén desde o núcleo de Hospital (Dumbría).
Esta colosal formación granítica está constituída por un enorme penedo dunhas 150 tm, que descansa sobre outro de formas redondeadas, que fai de base, de aí que tamén se denominase Pedra Cabalgada. Chama a atención como a rocha superior é capaz de manter o equilibrio sobre unha base de apoio de dimensións tan reducidas (menos de un metro cadrado de superficie).
Para explicar a orixe desta formación temos que retrotraernos a máis de 300 millóns de anos, momento no que se formarían estes granitos na profundidade da codia terrestre, e logo irían ascendendo á superficie e desprendéndose de capas de materiais que se foron depositando enriba, ata quedar ao descuberto. A erosión da auga e do vento foi moldeando estas rochas ata deixar a escultura natural tal como a percibimos na actualidade. Na parte superior desta Pedra do Brazal hai varias pías, algunha delas acada unha profundidade de 50 cm e mantén a retención de auga case todo ao ano. No penedo que fai de base tamén se ve unha destas formacións de gran tamaño, pero máis evolucionada posto que dispón dunha profunda canle de desaugadoiro.
Modesto García Quintas, estudoso do concello de Dumbría, conta que esta Pedra Cabalgada, polos anos sesenta do pasado século, correu o risco de desaparecer cando uns traballadores que estaban a realizar unhas obras cunha pa mecánica nas proximidades, apostaron uns bocadillos e unhas bebidas a que a forza da máquina era capaz de derrubar semellante penedo. Ou ben non intentaron levar a cabo tan desacertada aposta ou o peso da pedra resistiu a potencia da máquina, pero por fortuna, o monumento natural segue en pé.
Preto da pedra do Brazal sitúase o castro do monte Castelo de Logoso, unha auténtica atalaia sobre esta parte do territorio do concello de Dumbría, que permite gozar ao viaxeiro de fermosas vistas sobre a paisaxe de arredor. O recinto castrexo está defendido por tres murallas pola parte sur; e pola norte, por unha muralla e un foxo. Conserva a lenda de que hai un caldeiro de ouro soterrado, moi común neste tipo de poboados da Idade de Ferro.
