A CMAT escolleu o Parador Costa da Morte, en Muxía, como sede do VI Encontro de Turismo da Costa da Morte, que se celebrará o vindeiro 17 de novembro, cinco anos despois de que este mesmo espazo acollese a primeira edición da cita. O encontro conta coa financiación da Axencia Turismo de Galicia e a colaboración da Deputación da Coruña.
O regreso a Muxía ten un significado especial para unha iniciativa que, desde aquel primeiro encontro celebrado en 2021, foi medrando en participación, alcance e repercusión ata converterse nunha das datas sinaladas no calendario turístico do territorio. Naquela primeira edición, o encontro daba os seus primeiros pasos e aínda estaba lonxe da dimensión que ten acadado hoxe, pero foi precisamente no Parador onde se puxo a primeira pedra dunha cita que cinco anos despois xa está plenamente consolidada.
A elección deste escenario, entre as propostas recibidas para acoller esta edición, permite así volver ao punto de partida e poñer en perspectiva o camiño percorrido, nun encontro que reunirá de novo a representantes públicos e privados vinculados ao turismo da Costa da Morte.
O VI Encontro será tamén un espazo para compartir o traballo desenvolvido pola CMAT ao longo do último ano, presentar novas propostas e abordar os retos e oportunidades que ten por diante o xeodestino, reforzando a colaboración entre os diferentes axentes que traballan polo seu desenvolvemento.
Durante o encontro terá lugar tamén a entrega do IV Premio Embaixador/a Costa da Morte, co que a CMAT recoñece a persoas que contribúen a dar visibilidade ao territorio e a proxectar a súa identidade e os seus valores máis alá das súas fronteiras. Nas edicións anteriores, o galardón recaeu en Bieito Romero, membro fundador de Luar na Lubre; Jorge Mira, catedrático de Física Aplicada da Universidade de Santiago de Compostela; e Marta Lado, actriz e creadora fisterrá, cunha destacada traxectoria no cine e no teatro galegos. O nomeamento da persoa que recibirá o recoñecemento nesta sexta edición darase a coñecer proximamente.
Nesta edición, a CMAT incorporará ademais un recoñecemento colectivo ás entidades de inclusión social que traballan no territorio, como agradecemento ao seu labor para favorecer que todas as persoas poidan gozar dos recursos, experiencias e tesouros que ofrece a Costa da Morte.
Un encontro que medra co territorio
Desde aquel primeiro encontro no Parador Costa da Morte en 2021, a iniciativa pasou por Costa Caión, na Laracha; a Torre de Laxe; o Pazo de Trasariz, en Vimianzo; e o Pazo de Villar de Francos, en Carballo. Cada edición serviu para achegar o encontro a diferentes puntos da Costa da Morte e, ao mesmo tempo, para reforzar os vínculos entre os axentes públicos e privados que forman parte do destino.
O encontro converterá así o Parador Costa da Morte nun espazo para celebrar o camiño percorrido, recoñecer o traballo que se fai desde o territorio e seguir debuxando xuntos o futuro turístico da Costa da Morte.
Para máis información ou confirmación de asistencia, contactar co equipo de Asistencia Técnica da CMAT:
comunicacion@visitacostadamorte.com
621 25 63 91 (Jessica Lago) / 634 09 21 12 (Marta Baños)
