O Pazo de Villar de Francos acolleu este martes 11 de novembro a quinta edición dun encontro que reuniu a máis de 150 profesionais e representantes institucionais do sector turístico da Costa da Morte. A Costa da Morte Asociación Turística (CMAT) pecha cun balance moi positivo o V Encontro de Turismo da Costa da Morte, unha cita xa consolidada que cada ano reúne a axentes públicos, sector empresarial e profesionais do territorio.
A implicación institucional no desenvolvemento da Costa da Morte
O acto, conducido polo presentador de Radiovoz Francisco Rodríguez, comezou coa intervención do alcalde de Carballo, Daniel Pérez, anfitrión da edición deste ano. Durante a súa benvida, subliñou o seu agradecemento por elixir o Pazo de Villar de Francos como sede e a importancia de “contar con todas as partes para conseguir un sector sólido, desde a veciñanza ata as administracións”, unha mensaxe que marcou o ton colaborativo da sesión.
A continuación, o vicepresidente e deputado de Turismo da Deputación da Coruña, Xosé Regueira, centrou a súa intervención na consolidación do destino como espazo cohesionado e competitivo. Regueira remarcou o especial que será 2026 para a Costa da Morte tanto polo eclipse coma polo trienio Xacobeo, e fixo fincapé nos desafíos e oportunidades vinculados a estes dous eventos, que o tecido debe aproveitar para fidelizar os visitantes.
O bloque institucional pechouse coa intervención do director da Axencia Turismo de Galicia, Xosé Manuel Merelles, quen repasou os datos positivos da tempada e a evolución do destino. Merelles indicou que “todos os datos e estatísticas sinalan que a Costa da Morte é un dos destinos preferidos polos que visitan Galicia, representados por máis de vinte nacionalidades distintas”, e que o territorio continúa reforzando o seu posicionamento como un destino con identidade propia e oferta diferenciada.
O sector privado reafirma o seu compromiso
Por parte do sector privado, Pepe Formoso, presidente de APTCM e secretario da CMAT, presentou o relatorio “Erre que erre, tamén nos meses con R”. Formoso fixo unha defensa clara do asociacionismo e da colaboración entre empresas, destacando que “é responsabilidade nosa facer saber a calidade do noso produto” e a necesidade de manter un tecido empresarial forte e unido.
Homenaxe ás asociacións de palilleiras da Costa da Morte
Un dos momentos máis emotivos da tarde foi o recoñecemento ás nove asociacións de palilleiras da Costa da Morte, símbolo vivo dun oficio que forma parte da identidade cultural e creativa do territorio. En nome das homenaxeadas, Dolores Lema, directora da Mostra do Encaixe de Camariñas, agradeceu o galardón e sinalou que este recoñecemento se estende tamén ás súas nais e avoas, que foron as que lles ensinaron todo, reivindicando o valor dun traballo que continúa transmitíndose entre xeracións.
Marta Lado, Embaixadora da Costa da Morte 2025
A CMAT entregou o recoñecemento de III Embaixadora da Costa da Morte a Marta Lado. Durante a entrega, púxose en valor non só a súa carreira profesional, senón tamén a súa fonda vinculación coa Costa da Morte e a súa defensa constante da lingua, da cultura, da natureza e da autenticidade desta terra: “Marta ten esa capacidade de contar o territorio desde a emoción, desde a verdade, desde a pertenza”.
A actriz fisterrá Marta Lado emocionouse ao saber que o agasallo que recibiu foi elaborado polas mesmas palilleiras presentes na sala, e expresou o seu agradecemento por recoñecer algo que para ela é natural: estar orgullosa do seu territorio e sentir a responsabilidade de coidalo para que as futuras xeracións o poidan gozar igual que o fixo ela de pequena.
Unidade, identidade e futuro compartido
O presidente da CMAT e alcalde da Laracha, José Manuel López, clausurou o encontro cunha intervención centrada na importancia da colaboración e da identidade territorial. Agradeceu a presenza das autoridades e entidades convidadas, subliñando que este respaldo confirma un compromiso real coa Costa da Morte. Durante o seu discurso, destacou que 2025 foi un ano de evolución para a entidade, no que a renovación da Xunta Directiva permitiu reforzar liñas de traballo e abrir novas vías sen perder a visión compartida dun destino cohesionado.
O presidente insistiu na importancia de situar as persoas no centro do proxecto turístico: “Ningún destino se sostén só con campañas ou promoción. Un destino sostense coa súa xente, coa que o habita, o traballa e o vive”.
Pechou o seu discurso cunha chamada clara ao traballo colectivo, lembrando que o avance do destino é froito dun esforzo compartido entre administracións, empresas, profesionais e veciñanza. Afirmou que “se seguimos sumando esforzos, reforzando a nosa identidade e valorando o talento da nosa xente, a Costa da Morte seguirá sendo un dos territorios máis auténticos, inspiradores e con máis futuro de Galicia”.
Actuación musical e espazo para a conversa
A xornada concluíu coa actuación de Antía Muiño, unha das voces emerxentes máis recoñecidas da escena musical galega. Co seu estilo íntimo e contemporáneo, a artista ofreceu un pequeno concerto no que interpretou varias das súas pezas máis coñecidas, creando un ambiente cercano e emocional que conectou de inmediato co público. A súa actuación serviu como colofón perfecto para unha tarde dedicada ao territorio, á creatividade e ao talento local.
Tras o concerto, as persoas asistentes participaron nun espazo pensado para fomentar a conversa, fortalecer vínculos profesionais e seguir construíndo relacións entre as entidades e persoas que conforman o sector turístico da Costa da Morte.
A CMAT organiza este acto grazas ao convenio asinado coa Axencia Turismo de Galicia, e desenvolve tamén outras actividades de promoción turística por medio dunha subvención recibida pola Deputación da Coruña.
