O premio, que consistirá nunha noite para dúas persoas e unha experiencia gastronómica, será entregado tanto á persoa gañadora do Premio do Público como á gañadora do Premio do Xurado
ZAS, 30/10/2024. O I Concurso Fotográfico Costa da Morte, Naturalmente Salvaxe, organizado pola CMAT, finaliza este 31 de outubro ás 23:59. Será nese momento cando o xurado delibere entre as máis de cincuenta fotografías participantes e decida as tres finalistas que competirán polo Premio do Xurado.
A primeira edición deste concurso conta tanto cun Premio do Público como cun Premio do Xurado. Será este último o que precisará da deliberación do xurado, cuxa composición será dada a coñecer na próxima semana.
Experiencias na Costa da Morte para premiar aos gañadores
O Premio do Público será para a fotografia que, no momento en que finalice o concurso,
conte con máis gústame na publicación de Instagram coa que participou no mesmo.
No Premio do Xurado, a decisión sairá das persoas do xurado, que elixirán de entre todas
as fotografias participantes tres finalistas, das que haberá unha gañadora. Tanto esta fotografía como as outras dúas finalistas e a gañadora do Premio do Público serán expostas durante o IV Encontro de Turismo da Costa da Morte, organizado pola CMAT, que se celebrará o martes 12 de novembro no Pazo de Trasariz, en Vimianzo.
Os premios consistirán nunha noite para dúas persoas nun establecemento da Costa da Morte e unha experiencia gastronómica, ademais da entrega da fotografía impresa e un diploma.
Unha primeira edición exitosa
Este concurso fotográfico, activo durante cinco meses nas redes sociais da CMAT, serviu para coñecer a visión que as diferentes persoas que visitan e viven na Costa da Morte teñen sobre o noso territorio.
Manuel Muíño, presidente da CMAT e alcalde de Zas, valorou positivamente o desenvolvemento do concurso: «Baixo o cancelo #concursonaturalmentesalvaxe, máis de 50 fotografías demostran a diversidade de puntos de vista que a comunidade da CMAT ten nas redes sociais. Esta primeira edición abre unha boa oportunidade para seguir ampliando as iniciativas de promoción turística nas redes sociais».
