O “Escape Room” das Torres do Allo rexistra 75 reservas nunha semana

A nova actividade deseñada pola Concellería de Cultura de Zas para visitar e coñecer a historia do pazo máis antigo de Galicia está superando tódalas expectativas. Dende que se anunciara nas redes sociais a semana pasada esta orixinal actividade no Pazo do Allo, máis de setenta e cinco persoas reservaron praza para visitar as Torres en menos dunha semana.

Un “escape room” é un xogo de escapismo onde un grupo de persoas teñen un tempo limitado para conseguir saír da estancia onde están encerrados. A través dunha historia que fía a narración, o equipo ten que ir resolvendo puzzles, abrindo cadeados, e utilizando obxectos especiais para conseguir escapar no menor tempo posible. Unha actividade diferente para persoas que busquen unha experiencia activa, esixente e divertida.

As Torres do Allo convértense nun gran taboleiro de xogo onde un grupo de entre 2 e 10 persoas ten 90 minutos para resolver o misterio e poder volver ás súas casas. O primeiro “Pazo Escape” do mundo ponse en marcha este verán no Concello de Zas. A actividade é completamente gratuíta e pódese realizar de luns a domingo ás 11:30 ou ás 16:30 baixo reserva previa (info@torresdoallo.gal).