O evento celebrarase en Cee dos días 1 ao 4 de outubro
A Asociación de Turismo da Costa da Morte (CMAT) espera que o evento sexa un revulsivo a nivel turístico para toda a contorna
A Fundación Starlight ven de anunciar a apertura das inscricións para o Encontro Anual de Astroturismo. Como xa foi anunciado hai dous meses, este importante encontro internacional será celebrado na Costa da Morte, concretamente en Cee, entre os días 1 e 4 de outubro deste ano 2024.
50 ponentes, 4 mesas redondas e 200 participantes
Durante os días que durará o encontro, celebraranse interesantes mesas redondas que contarán coa participación de persoas expertas en diversos eidos científicos, como Rafael Rebolo, director do Instituto de Astrofísica de Canarias (IAC) e investigador do CSIC ou Antonia M. Varela, directora da Fundación Starlight e Doutora en Astrofísica.
As conferencias, para as cales xa están abertas as inscricións, serán as seguintes: «Los valores del astroturismo»; «Astroturismo: Un instrumento para la sostenibilidad y para mitigar el cambio climático»; «Astroturismo y Desarrollo Económico Local»; «Educación, Capacitación y Difusión».
Ademais, o VII Encontro Internacional Starlight de Astroturismo coincidirá coa II Conferencia Internacional Starlight.
Unha gran oportunidade para a Costa da Morte
O Encontro Anual Starlight de Astroturismo é un evento de gran importancia a nivel tanto turístico como astronómico que permite a diferentes profesionais e expertos intercambiar experiencias relacionadas co astroturismo e establecer pautas para o futuro. Por estas razóns, o feito de celebralo na Costa da Morte é un fito de gran importancia para o territorio.
A elección da Costa da Morte como sede para este encontro supón unha gran oportunidade para todo o xeodestino en conxunto, pois se trata dun evento que reunirá a moitas persoas que terán a ocasión de visitar diferentes puntos emblemáticos da Costa da Morte.
Máis información: https://encuentroanualstarlight.fundacionstarlight.org/es/el-encuentro-anual-starlight-de-astroturismo/#sobre-el-evento
Inscricións online ata o 20 de setembro: https://docs.google.com/forms/d/e/1FAIpQLSe1Lm5Dhu922yyFsOtq2QDZsVSYKY6OojoClxJtzgCKa3CWqA/viewform
