Marta Rodríguez, do equipo da Secretaría Técnica de Costa da Morte Asociación Turística, detallou o longo camiño percorrido para obter o Certificado Destino Turístico Starlight e lembrou que os concellos do territorio traballan xa na redución da contaminación luminosa e nunha rede de miradoiros estelares.
A cita internacional dos profesionais do astroturismo, no que a Costa da Morte foi o único destino presente do noroeste peninsular, deu voz a outras iniciativas líderes no turismo de estrelas ao redor do mundo.
Costa da Morte, as estrelas desde a fin do mundo. Este foi o título da conferencia que impartiu esta tarde Marta Rodríguez, do equipo da Secretaría Técnica de Costa da Morte Asociación Turística (CMAT) no VI Encontro Internacional Starlight, que se celebra na cidade de Cuenca desde hoxe (18/10/2023) e ata o próximo venres (20/10/2023). Costa da Morte é o único destino do noroeste peninsular que terá a oportunidade de expoñer a súa experiencia nesta cita, referencia mundial dos profesionais vinculados ao astroturismo e na que están presentes outros destinos Starlight certificados do territorio español e representantes de países líderes no turismo das estrelas.
“A participación neste encontro é unha oportunidade única para situar a Costa da Morte no mapa internacional do turismo de calidade”, destaca o presidente da Costa da Morte Asociación Turística, Manuel Muíño, tamén alcalde de Zas. Pola súa banda, o presidente da Asociación Profesional do Sector Turístico da Costa da Morte (APTCM), Pepe Formoso, lembra a oportunidade que representa darlle voz ao destino Costa da Morte nesta cita do astroturismo: “Seguindo un proceso modélico para obter o distintivo Destino Turístico Starlight, logramos facernos un oco no turismo das estrelas, a través do cal poder divulgar todo o patrimonio natural e cultural do noso territorio, e non só o ceo nocturno e as estrelas senón, sobre todo, os nosos espectaculares solpores”.
Na súa exposición no auditorio do Museo Paleontolóxico de Castilla-La Mancha, en Cuenca, Marta Rodríguez detallou a experiencia da Costa da Morte para obter a Certificación Destino Starlight, iniciado a finais do ano 2021, cun acordo unánime da asemblea xeral da CMAT e rematado en xaneiro de 2023 en FITUR, onde os representantes da Costa da Morte Asociación Turística recibiron o certificado Destino Turístico Starlight de mans de Antonia Varela, presidenta da Fundación Starlight.
Claves e obxectivos
Marta Rodríguez enumerou as claves para obter ese recoñecemento na Costa da Morte: “Calidade do ceo nocturno; compromiso político e empresarial xunto coa presenza dun ente xestor; estratexia de xestión, coordinación e planificación; un destino turístico consolidado e o apoio da comunidade científica”.
Falou tamén dos traballos nos que están inmersos os 17 concellos que integran a CMAT e a iniciativa privada, liderada por APTCM, para seguir dando pasos en prol do afianzamento no eido do astroturismo. Destacou dúas iniciativas estratéxicas que xa están en marcha: “o impulso cara a concienciación dos concellos no tocante á redución da contaminación luminosa, a través da iluminación pública intelixente, así como a valoración de aprobar, nun futuro, ordenanzas municipais que regulen o alumeado público tendo en conta parámetros que coiden da calidade do ceo nocturno”, e a “elaboración dun estudo inicial sobre unha rede de miradoiros estelares, en colaboración cos dezasete concellos que integran o xeodestino e o grupo de monitores astronómicos que se formou no curso impartido pola Fundación Starlight no mes de abril en Vimianzo”.
Foi un orgullo para a Costa da Morte Asociación Turística que fose a propia Directora da Fundación, Antonia Varela, quen eloxiara o bo traballo da entidade, situándoa como referente no Encontro pola posta en marcha de iniciativas tan importantes como a profesionalización do sector a través do curso de Monitores Astronómicos Starlight, a creación da Mesa Starlight o pasado mes de setembro con integrantes da CMAT, Universidade, Turismo de Galicia e Deputación da Coruña, e a xornada de sensibilización para municipios no tocante á contaminación luminosa, que se está a organizar para ser celebrada o próximo mes de novembro.
