No marco do Convenio de colaboración asinado con Turismo de Galicia o día 9 de agosto de 2023, a CMAT organizou o pasado xoves 23 de novembro, nas Torres do Allo, en Zas, unha reunión de traballo de carácter técnico sobre o proxecto de Astroturismo. Foron convocados os técnicos de turismo dos Concellos, ADL’s, técnicos de cultura, etc., así como os profesionais que realizaron o curso de monitores turísticos Starlight a principios deste ano 2023.
Na reunión tratáronse os seguintes puntos:
- Resumo das accións levadas a cabo desde a CMAT no proxecto esta anualidade en canto ao astroturismo.
- Resumo das achegas realizadas polos concellos sobre os mellores lugares para a observación nocturna e valoración conxunta.
- Conclusións do Congreso Internacional Starlight celebrado en Cuenca en outubro. Ideas e boas prácticas aplicables a Costa da Morte.
- Proposta e recollida de ideas sobre actividades relacionadas coa creación de produto turístico baseado no Astroturismo para a anualidade 2024.
Algunhas propostas que se trataron:
- Elaboración dunha axenda de xornadas de astroturismo 2024: Coordinación para a promoción conxunta baixo unha marca común, con actividades organizadas tanto por concellos como por empresas.
- Realización dun pequeno congreso sobre astroturismo: Baseado principalmente en creación de produto turístico e cunha parte de contaminación luminosa.
- Realización de comunicación específica en turismodeestrellas.com.
- Recollida de datos sobre os Monitores Starlight para a web visitacostadamorte.com.
