A CMAT – Costa da Morte Asociación de Turismo foi beneficiaria dunha axuda para desenvolver o proxecto «Cartografía do mar: patrimonio, produto local e pesca artesanal na Costa da Morte», unha iniciativa destinada a impulsar a promoción dos produtos da pesca costeira artesanal, fomentar o seu consumo responsable e achegar á cidadanía o coñecemento do patrimonio e dos oficios vinculados ao mar.
O proxecto, cun orzamento total de 63.283 euros, desenvólvese ao abeiro das axudas para proxectos incluídos nas Estratexias de Desenvolvemento Local Participativo (EDLP), xestionadas polo GALP Seo de Fisterra Ría de Muros Noia Costa Sostible, no marco do Fondo Europeo Marítimo, de Pesca e de Acuicultura (FEMPA) 2021-2027. Enmárcase na Prioridade 3 do fondo, que busca favorecer unha economía azul sostible e impulsar o desenvolvemento das comunidades pesqueiras e acuícolas das zonas costeiras.
A iniciativa desenvolverase no ámbito territorial correspondente ao GALP Seo de Fisterra Ría de Muros Noia Costa Sostible, nos concellos de Dumbría, Cee, Corcubión, Fisterra e Carnota.
Coñecer o produto para valorar o traballo do mar
«Cartografía do mar» combina accións educativas, divulgativas e promocionais para mellorar o coñecemento dos recursos pesqueiros locais e reforzar a relación entre a cidadanía e o sector da pesca artesanal.
Unha das principais actuacións será a elaboración dunha unidade didáctica dixital e interactiva sobre os recursos pesqueiros da Costa da Morte, adaptada ao currículo do primeiro ciclo de Educación Primaria. Este material incluirá información sobre a importancia da pesca sostible e o consumo responsable, as artes de pesca, un calendario de especies por tempada, fichas identificativas dos produtos máis destacados e contidos sobre os procesos de etiquetaxe e venda. Incorporará tamén ilustracións, fotografías, vídeos, xogos e actividades interactivas e estará dispoñible na web da CMAT como recurso divulgativo.
O patrimonio mariñeiro constitúe outro dos eixes do proxecto, cunha actuación específica de recuperación e difusión das cartas náuticas da Costa da Morte. A iniciativa pretende destacar o seu valor como parte da historia da navegación, da pesca e do coñecemento do litoral. Esta acción completarase cun acto público no que participarán persoas expertas, representantes da CMAT, axentes culturais e turísticos, profesionais do sector pesqueiro e público interesado.
O programa inclúe tamén visitas guiadas polas lonxas, mercados e espazos vinculados aos oficios do mar. Estas experiencias permitirán coñecer a realidade da pesca artesanal e a cadea de valor dos produtos mariñeiros locais, da man de persoas que traballan nestes ámbitos. As visitas terán unha duración aproximada de 90 minutos e un máximo de 20 participantes. En 2027 realizaranse as primeiras 12, tras o deseño da estrutura e dos itinerarios, e en 2028 desenvolveranse outras 12.
A promoción do consumo de produto mariñeiro local completarase cunha campaña informativa e audiovisual en colaboración con mercados, lonxas e peixerías. Os contidos achegarán información práctica sobre os produtos máis destacados de cada zona, a súa estacionalidade, os seus usos culinarios e o seu valor nutricional, ademais de ofrecer orientación para escoller o produto máis axeitado segundo a elaboración que se queira realizar.
Tres anualidades de traballo
O proxecto executarase entre 2026 e 2028. A primeira anualidade estará centrada na creación da identidade gráfica, na coordinación cos axentes do territorio e na elaboración da unidade didáctica. En 2027 comezará a súa implementación nos centros educativos, desenvolverase a acción de recuperación e difusión das cartas náuticas e iniciaranse tanto as visitas guiadas como a campaña de promoción do produto local. Durante 2028 completarase a implementación educativa e darase continuidade ás visitas e á campaña.
O proxecto conta cun orzamento total de 63.283 euros, dos que 54.423,38 euros corresponden á axuda concedida, distribuída en tres anualidades: 14.984,64 euros en 2026, 23.413,50 euros en 2027 e 16.025,24 euros en 2028. Esta achega supón o 86 % do orzamento total.
A través de «Cartografía do mar», a CMAT busca reforzar o coñecemento e a valoración dos produtos da pesca artesanal, promover hábitos de consumo máis responsables e contribuír á difusión dunha cultura mariñeira que forma parte da identidade e da actividade económica da Costa da Morte.
