A representación da CMAT estivo composta polo seu presidente e alcalde de A Laracha, José Manuel López Varela, por Sandra Vilela Riveiro —tesoureira da entidade e tenente de alcalde de Muxía— e polo alcalde de Fisterra, Luis M. Ínsua Lago, que acompañaron ás autoridades portuguesas e aos socios do proxecto nun encontro simbólico celebrado xunto ao Farol de Montedor, en Carreço (Viana do Castelo).
Este acto supón unha continuación natural do celebrado o pasado 19 de setembro na Costa da Morte, durante o Interreg Cooperation Day, no que se inauguraron as primeiras mesas interpretativas en Cabo Touriñán, Monte Pindo e Cabo Fisterra. Ademais, no marco do proxecto tamén está prevista a instalación dunha mesa interpretativa en Muxía, reforzando así os puntos clave desde os que se contempla o último solpor da Europa continental ao longo do ano.
Para a CMAT, ser entidade asociada do proxecto Atlantic Sunset representa unha “oportunidade estratéxica para fortalecer a cooperación co norte de Portugal e reforzar a identidade atlántica compartida”, tal e como destacou o seu presidente durante a intervención. Así mesmo, subliñou que este proxecto permite avanzar na creación de produtos turísticos sostibles baseados no patrimonio natural, cultural e científico, en colaboración con universidades e centros de investigación de ambos lados da fronteira.
O proyecto Atlantic Sunset, do que tamén é socia a Universidade de Santiago de Compostela, está coordinado pola Fundación Centro de Estudos Eurorrexionais (FCEER) e conta co apoio do Programa Interreg Atlantic Area. O seu obxectivo é crear unha rede atlántica que poña en valor as postas de sol como recurso patrimonial, turístico e identitario común.
👉 Máis información sobre o proxecto:
https://atlanticsunset.eu/
