Hai lugares na Costa da Morte que conservan un prezado patrimonio histórico, pero por situarse afastados das principais vías de comunicación pasan desapercibidos para os visitantes, e incluso, para os propios habitantes locais. Certo é tamén que á hora de promocionar o territorio, concédeselle maior visibilidade á zona costeira que a do interior. A torre da Penela e a igrexa de San Martiño de Riobó, dous lugares do concello de cabana de Bergantiños, son un bo exemplo do expresado anteriormente.
A aldea da Penela, pertencente á parroquia de Silvarredonda, é coñecida pola torre que se conserva nesta pequena aldea e que formou parte dunha fortaleza da familia dos Bermúdez de Castro. Posiblemente existisen dúas torres máis. A torre que se conserva podería ser a da homenaxe. Presenta unha forma cadrada e tres alturas, rematada en ameas, cos merlóns moi separados.
A entrada principal está formada por un arco de medio punto con grandes doelas, semellante ao da torre norte das Torres do Allo. Arredor desta porta móstranse pezas de boa cantería, pero esta calidade non é uniforme no resto dos muros. Nunha abertura da primeira planta sitúase un escudo no que se representan os símbolos das familias Bermúdez, Moscoso, Castro e Rioboo.
O fundador deste vínculo da Penela foi Lope Bermúdez de Castro, procedente dos antigos Bermúdez de Montaos. A comezos do século XVII, esta fortaleza foi transformada nun pazo por Lourenzo Bermúdez de Castro. Uns descendentes desta familia serían os fundadores do morgado das Torres do Allo.
Logo esta propiedade pasará a mans dos Ozores, condes de Priegue, e finalmente, será adquirida pola familia campesiña Castro Ribeira, coa condición de que a torre non fose vendida a persoas alleas aos antigos propietarios. Estes no ano 2022 chegarán a un acordo co concello de Cabana de Bergantiños para que a fortaleza pasase a propiedade municipal. Agora a necesaria rehabilitación está pendente da dotación de recursos económicos para tal fin.
Nas proximidades da torre hai unha fonte no medio dun acolledor bosque de abeleiras. Unha lenda conta que entre a fonte e a torre había un túnel, e a través del os donos da fortaleza abastecíanse de auga no caso de asedio.
Preto da Penela atópase a igrexa parroquial de San Martiño de Riobó, vinculada aos señores da torre da Penela. Algúns deles soterráronse no seu interior, como Rui Soneira de Rioboo e o seu neto Lourenzo Bermúdez de Castro, falecido en 1625, e a súa dona María de Leis. O templo conserva a base románica, pero sufriu unha profunda reforma posteriormente. A ábsida é a parte que máis se axusta á obra primitiva. A nave foi refeita a mediados do século XVIII. No interior destaca o magnífico retablo maior da mesma época que a remodelación da igrexa, unha obra anónima inspirada nos mestres composteláns do momento.
Cerca da parroquial de Riobó queda a ermida de San Brais de Folgoso, situada sobre a croa dun castro, exemplo de cristianización dun espazo sagrado anterior, e tamén o pozo da Forca, nun lugar natural extraordinario. A súa profundidade deu orixe a varias lendas, unha delas fala de que no fondo hai unha grade de ouro.
