O concello de Mazaricos no pode ofrecer ao visitante unha paisaxe marítima, porque carece de litoral, pero reúne óptimas condicións para ofrecer paisaxes nas que a auga doce é protagonista polos numerosos ríos e regatos que atravesan o seu territorio.
O descenso brusco dalgúns destes ríos, como o Arcos, Beba ou Santa Locaia, dan lugar a rápidos e fervenzas que forman espazos espectaculares para os visitantes que se acheguen a estas terras do interior da Costa da Morte.
Para a ruta das fervenzas que se propón por este concello seleccionáronse catro delas que nos pareceron as máis interesantes e accesibles. Tres próximas entre si: as de Fírvado, Vioxo-Chacín e Santa Locaia, e outra máis afastada, a de Noveira. As tres primeiras serían para visitar nunha xornada, e de dar tempo e ter ganas, tamén se podería ver a cuarta, se non, deixaríase para outra viaxe.
Para visitar a fervenza de Fírvado, colleremos a estrada AC-400 e ao chegar á aldea de Suevos, tomaremos a que conduce ao lugar de Fírvado. A cascada principal, xa que hai varias, dista uns 770 m da aldea e sitúase na confluencia dos ríos Beba e do seu afluente Xende. No denominado Pozo Negro, hai a lenda que di que no amencer da noite de San Xoán emerxe unha grade de ouro.
Desde Fírvado volvemos á estrada xeral e collemos dirección ao Pino do Val, para visitar a fervenza de Vioxo-Chacín. Neste cruce, continuamos pola mesma estrada uns dous quilómetros ata Lamasapín, onde nos desviamos á dereita cara a Vioxo e Chacín. A 1,5 km, deixamos o coche e tomamos un camiño á esquerda que nos leva á fervenza, despois de andar uns 350 m. A cascada atópase no regato do Casteliño, un afluente do río Entíns que desemboca na Serra de Outes, na ría de Muros e Noia.
Para visitar a fervenza de Santa Locaia continuamos de fronte ata Chacín e logo collemos a estrada DP-4502 en dirección a Serra de Outes uns 3 km ata chegar á capela de Santa Locaia, situada á esquerda da estrada. Deixamos alí o vehículo e, despois de andar uns 100 m polo medio dunha fraga, chegamos á cachoeira que forma neste lugar o regato do Vao da Denociña, afluente do río Entíns. Asociada á mesma consérvase unha fermosa lenda que conta que uns ladróns roubaron a campá desta capela, logo fuxiron con ela ao lombo polo medio da devesa. Ao intentar cruzar o río esvararon no musgo que cubre as pedras da beira e a campá caeulles á auga. Milagrosamente afundiuse o terreo e orixinou a catarata e o pozo no que cae a auga, que desde aquela se denomina Pozo das Campás.
Para visitar a fervenza de Noveira, última desta ruta, temos que volver ao Pino do Val e coller a estrada que vai a Muros ata As Paxareiras. Neste lugar tomar á dereita a que conduce á parroquia de Arcos e a Noveira. Antes de chegar a este último núcleo hai unha indicación para desviarse cara a este fermoso lugar. Máis doado de acceder resulta desde o Ézaro (Dumbría). A auga do río Arcos precipítase con forza sobre un pozo labrado na rocha, que se converte nunha auténtica piscina natural para o baño en tempo de verán.
