A vila de Carballo formouse na banda dereita do Anllóns na primeira metade do século XVIII tralo redescubrimento das augas termais. Na outra beira do río, situábase a antiga parroquia de San Xoán de Carballo, de orixe medieval. Polos anos vinte do pasado século esta localidade estaba considerada como un núcleo moderno e ben trazado, pero o crecemento anárquico na década dos setenta, ademais de destruír os edificios máis singulares, provocou que a vila carballesa fose considerada como un exemplo de feísmo. A aprobación do plan urbanístico reconduciu esta anómala situación, pero o estereotipo negativo anterior aínda permanece na memoria dos carballeses e visitantes.
Coa intención de proxectar unha nova imaxe da capital bergantiñá e converter Carballo nun museo ao aire libre con propostas artísticas de vangarda que sorprendan á cidadanía, e ao mesmo tempo, crear un recurso turístico, o concello carballés iniciou no ano 2013 o proxecto denominado Derrubando Muros con Pintura
O primeiro muro “derrubado” foi o dunha antiga casa situada á entrada da rúa do Sol, na que as artistas Paula Fraile e Roberta Venanzi, coordinadoras do proxecto, plasmaron o mural “O Carballo”, unha exaltación da vexetación e da árbore que dá nome á vila. O proxecto ampliarase ao ano seguinte con obras de artistas locais e consolidarase a partir do 2015 coa posta en marcha do Festival Internacional de Arte Público de Carballo, coñecido como Rexenera Fest, co obxectivo de reunir durante unha semana, na primavera de cada ano, a grandes creadores galegos, estatais e internacionais de arte urbana ou street art.
Durante a celebración do evento os artistas convidados pintan de forma simultánea en diferentes rúas da vila e a veciñanza ten a ocasión de observar o proceso de desenvolvemento de cada obra. Por Carballo pasaron creadores de gran prestixio, como o portugués Bodalo II, o italiano Pixel Pancho, o valenciano Dulk, o almeriense afincado en Galicia Nömada, a polaca Natalia Rak, a arxentina Milu Correch, a soriana Marta Lapeña, o zaragozano Isaac Mahou, o dúo valenciano PichiAvo, a lituana Marija Tiurina, o catalán Van Vúu, a vasca Udatxa ou os galegos Mou, Yoseba MP e Lidia Cao.
Neses mesmos días prográmanse outras actividades nas que os propios artistas teñen a oportunidade de comunicar a súa traxectoria creadora ou o proxecto que están a levar a cabo nesas xornadas. A música tamén está presente, e como remate deste acontecemento artístico, realízase un roteiro guiado no que se visitan obras da presente edición e anteriores.
Son xa máis de cen murais os que se expoñen neste museo ao aire libre de Carballo. O proxecto de arte urbana carballés xa adquiriu un recoñecemento mundial ao entrar a formar parte do grupo das 270 cidades de todo o planeta que apostaron por desenvolver iniciativas artísticas deste tipo. Na páxina web derrubandomuros.gal, hai unha completa información sobre este innovador proxecto artístico e unha proposta de rutas.
