ZAS, 07/11/2024. Costa da Morte Asociación Turistíca (CMAT) presentará un novo sitio web (visitacostadamorte.com ) durante o IV Encontro de Turismo da Costa da Morte, que se celebrará o próximo 12 de novembro no Pazo de Trasariz, en Vimianzo, ás 18 horas.
A nova web, creada por unha empresa do sector tecnolóxico da Costa da Morte para a CMAT, estará dispoñible a partir do propio día 12 de novembro. É unha web na que as diferentes partes implicadas levan traballando meses e que mellorará tanto a imaxe de marca da asociación e da Costa da Morte como a dispoñibilidade da información turística do territorio en internet.
Unha web de referencia sobre a Costa da Morte
Para o presidente da CMAT e alcalde de Zas, Manuel Muíño Espasandín, este novo espazo web «supón un cambio radical para o posicionamento da Costa da Morte e da imaxe da CMAT en internet. Falamos dunha páxina máis áxil, escalable e moderna.
Desenvolvida por unha axencia tecnolóxica da Costa da Morte e co traballo do escritor local Víctor Fernández Álves nos textos, a nova plataforma ten como obxectivo facilitar a exploración da Costa da Morte de forma intuitiva e accesible».
A información da antiga web foi trasladada e organizada para mellorar a experiencia dos usuarios que buscan na Costa da Morte un destino turístico de calidade. Algunhas das melloras con respecto á versión antiga da web da CMAT inclúen unha forte reorganización de contidos, a modernización do deseño, a mellora da usabilidade ou a creación dunha newsletter na que as persoas se poderán inscribir para recibir informacion relacionada cos eventos de interese turístico que se levan a cabo na Costa da Morte.
Esta nova web é, polo tanto, un reflexo do compromiso da CMAT co desenvolvemento da Costa da Morte e do seu turismo. Un traballo conxunto de diferentes profesionais da Costa da Morte para mellorar a imaxe do territorio en internet.
A web será presentada de xeito oficial durante o IV Encontro Anual de Turismo da Costa da Morte nun acto no cal se presentarán máis en detalle as melloras da nova web.
Mentres tanto, as persoas interesadas poderán subscribirse á newsletter a través da seguinte ligazón: visitacostadamorte.com
