Lorena Mariño, Diego Alonso e María Lema decidirán entre máis de corenta fotografías a gañadora do I Concurso Fotográfico Costa da Morte, Naturalmente Salvaxe
ZAS, 06/11/2024. Costa da Morte Asociación Turística (CMAT) anuncia as persoas que forman parte do xurado que elixirá a fotografía gañadora desta primeira edición do concurso fotografico Costa da Morte, Naturalmente Salvaxe. A persoa gañadora recibirá o premio durante a celebración do IV Encontro Anual de Turismo da Costa da Morte, que será o martes 12 de novembro ás 18:00h no Pazo de Trasariz, Vimianzo.
O xurado desta primeira edición
O xurado desta edición está formado por tres persoas.
Diego Alonso: nado en 1976, leva a fotografía no sangue. Vén dunha familia de fotógrafos que, desde o seu bisavó ata os seus pais, retrataron os momentos e as paisaxes da Costa da Morte, unha terra que lle deu as súas primeiras inspiracións e un fondo sentido de pertenza. No 2006 decidiu abrir o seu propio camiño e creou Diego Alonso Fotógrafo, un proxecto co que se adentrou no mundo da fotografía social. Agora, despois de case dúas décadas, a súa especialidade son as vodas. Gústalle pensar que o seu traballo é máis que unha serie de fotos: é capturar eses instantes únicos nos que dúas persoas se din “si” para sempre, e formar parte deses momentos éncheo de gratitude.
Lorena Mariño é unha fotógrafa de Malpica de Bergantiños. Actualmente adícase a realizar fotomontaxes con autorretratos, nos cales desenvolve en xeral un estilo escuro ou idílico procedente da inspiración que lle provocan as películas e historias de medo, as lendas cos seus seres fantásticos ou a mitoloxía.
María Lema é funcionaria de carreira da Deputación da Coruña, vicepresidenta da CMAT e concelleira de cultura, educación e turismo no Concello de Dumbría. Defínese como unha persoa á que lle gusta compartir o coñecemento e sempre disposta a aprender algo novo. En relación ao mundo da fotografía, é a impulsora do movemento #DumbríaÉ, creado en 2011 para visibilizar os departamentos e accións en redes do Concello de Dumbría, e proxectado aos longo dos anos en diferentes áreas, dando lugar a un concurso de fotografía co mesmo nome para visibilizar diferentes temáticas de Dumbría.
Os premios do concurso
Esta primeira edición contará con dous premios: un Premio do Público e un Premio do Xurado.
O Premio do Público será para a foto que, a 31 de outubro ás 23:59 horas, contara con máis gústame na publicación de Instagram coa que participou no concurso.
No Premio do Xurado, a decisión sairá do xurado mencionado, que terá que seleccionar entre todas as fotografías participantes tres finalistas, das que sairá a gañadora.
As catro fotografías (a premiada polo público e as tres finalistas do Premio do Xurado) serán expostas durante o IV Encontro de Turismo da Costa da Morte, organizado pola CMAT, que se celebrará o próximo 12 de novembro no Pazo de Trasariz, en Vimianzo.
Será nese evento onde se entregarán os premios ás dúas persoas gañadoras. Os premios consistirán nunha noite nun establecemento turístico da Costa da Morte para dúas persoas e unha experiencia gastronómica, ademais da entrega da fotografía impresa e un diploma.
Un concurso para promocionar a Costa da Morte
Este concurso fotográfico, que estivo activo desde xuño ata o 31 de outubro, serviu para dinamizar as redes sociais da CMAT, onde máis de cincuenta publicacións demostraron a gran riqueza natural do noso territorio baixo o cancelo #concursonaturalmentesalvaxe.
Manuel Muíño, presidente da CMAT e alcalde de Zas, valorou positivamente o desenvolvemento do concurso: «Esta primeira edición abre unha boa oportunidade para seguir ampliando as iniciativas de promoción turística nas redes sociais. A boa participación e a diversidade das imaxes demostran unha vez máis a riqueza do noso territorio en moitas áreas».
