As nenas e os nenos de Malpica non pararán un minuto este verán, porque xa desde finais deste mes e ata o final de agosto poden participar nun feixe de actividades organizadas pola Concellaría de Deportes coa colaboración de entidades e empresas.
A primeira cita será do 27 ao 29 deste mes, datas previstas para o xa tradicional curso de surf que organiza o club Silfo para nenas e nenos de 8 a 16 anos, e que soe ter unha altísima participación. E practicamente a continuación comezará o curso de kaiak promovido polo Club Náutico para maiores de 9 anos, xa que este ano levará a cabo do 2 a 4 de xullo.
Do 4 a 6 está prevista unha saída de aventura a Asturias, unha das actividades organizadas a través da Asociación Deportiva Costa Bergantiñá, da que forman parte os concellos de Cabana, Laxe, Ponteceso, Coristanco e Malpica. Esta actividade, que inclúe descenso do Sela en piragua ou senda do oso en bicicleta, entre outras propostas, ve destinada a nenos e nenas nacidos entre os anos 2001 e 2007.
Para xullo a oferta é moito máis ampla, xa que do 9 ao 13 desenvolverase o Campamento Deportivo Costa Bergantiñá para nenas e nenos nados entre os anos 2004 e 2011, e do 16 ao 20 celebrarase o Campus de Fútbol Costa Bergantiñá, para nenas e nenos nados entre o 2006 e o 2011. Durante o mes de agosto desenvolverase o Torneo de Fútbol Praia e Fútbol sala Infantil, para nenas e nenos de entre os anos 2003 e 2011, e todos os martes e xoves de 12.00 a 13.00 horas tamén haberá zumba praia para toda as idades, sen límite e sen cotas.
