Correos lanza un selo dedicado a Punta Nariga, recoñecendo a Costa da Morte como destino Starlight

Recentemente, Correos lanzou unha colección de selos dedicada ao turismo sostible, e entre os enclaves destacados atópase Punta Nariga, un dos nosos grandes tesouros naturais e parte do Destino Turístico Starlight Costa da Morte que promovemos desde a CMAT.

Este recoñecemento é froito dun traballo intenso e dunha firme aposta pola protección do ceo nocturno e o desenvolvemento dun turismo sostible. Grazas ao esforzo conxunto de entidades, profesionais do sector e institucións, a Costa da Morte acadou a certificación Starlight, converténdose nun lugar privilexiado para a observación astronómica.

O selo de Correos destaca a beleza e singularidade de Punta Nariga, co seu icónico faro baixo un impresionante manto de estrelas. Un recordatorio de que a Costa da Morte non só é historia, natureza e mar, senón tamén un lugar excepcional para mirar ao ceo e descubrir o universo.

Dende a CMAT, seguimos traballando para potenciar este tipo de iniciativas que posicionan a nosa comarca como un destino único. Grazas a todas as persoas e entidades que fan posible que a Costa da Morte brille con luz propia!