Proxecto Educativo Costa da Morte

Nesta sección poderás acceder ás unidades didácticas e materiais educativos impulsados pola CMAT, unha ferramenta pensada para achegar a Costa da Morte ás aulas dunha forma dinámica, transversal e conectada co territorio. Aquí atoparás recursos deseñados para descubri-lo patrimonio natural, cultural, histórico, paisaxístico e humano da Costa da Morte a través de propostas adaptadas ó ámbito educativo.

Este proxecto nace tamén dunha realidade moi presente no noso día a día: moitas veces coñecemos aquilo que temos máis cerca, no noso propio concello, pero non tanto o que existe no municipio veciño. Por iso, estas unidades buscan axudar ao alumnado a comprender a Costa da Morte como un territorio compartido, diverso e cheo de riqueza, fomentando o coñecemento do contorno desde unha mirada conxunta.

As propostas educativas están concebidas para integrarse facilmente no calendario lectivo e permitir un traballo transversal dos contidos curriculares, conectando distintas áreas de aprendizaxe a través de experiencias vinculadas ao territorio. Un recurso para aprender, explorar e fortalecer o vínculo das novas xeracións coa Costa da Morte.