O Museo do Mar de Laxe foi concibido e financiado dentro do extinto Plan de Dinamización Turística da Costa da Morte. O seu obxectivo principal era, nun principio, dobre: por un lado, conservar e restaurar un inmoble en estado ruinoso dentro do casco histórico de Laxe e, por outro, dotar a vila dun centro histórico – cultural relacionado co mar que contribúe a potenciar o sector turístico. Non estaba recollida inicialmente ningunha outra función para o Museo.
O Museo do Mar de Laxe está situado no inmoble que albergou a antiga casa cuartel da Garda Civil da localidade, que foi rehabilitada para albergar o museo. Forma parte do casco histórico da Vila de Laxe, e está situada ao lado da “Casa do Arco”, e na que aínda son visibles elementos dunha casa tradicional, como a “Loneira”, o lavadoiro de pedra, e a letrina, entre outros elementos.
Non se sabe con certeza cal foi a data exacta en que se levantou o actual inmoble pero debe remontarse a inicios ou mediados do século XIX posto que, ata os anos 70 do século XX, o inmoble albergou de forma continuada desde o século XIX o Cuartel da Garda Civil de Laxe.
Segundo datos recollidos da sede electrónica do catastro, o inmoble ten unha superficie construída de 424 m2, repartida en catro plantas [planta baixa, planta 1ª e planta 2ª, e a planta baixo cuberta].
