Esta campaña parte dunha idea clara: a Costa da Morte non é un decorado nin un produto construído artificialmente para o turismo. É un territorio vivo, habitado, cunha relación profunda entre as persoas e a súa contorna. Aquí, a paisaxe non se maquilla, a cultura non se representa: vívese. E esa verdade é precisamente o seu maior valor.
O lema da campaña recolle esa esencia: un lugar onde o mar, a terra, o vento, a luz e o silencio dialogan constantemente con quen o habita e con quen o visita. Un destino onde a identidade se manifesta na forza da natureza, na pegada da historia —castros, dólmenes, faros, camiños—, na gastronomía ligada ao mar e á terra, e tamén na forma de falar, de contar e de sentir o territorio.
Un primeiro vídeo que marca o inicio do camiño
A campaña arranca coa estrea dun vídeo promocional principal, unha peza audiovisual que percorre distintos espazos emblemáticos da Costa da Morte e que amosa o territorio tal e como é: sen artificios, cunha mirada honesta e próxima.
Un dos elementos máis destacados deste vídeo é a presenza das voces reais da xente da Costa da Morte, persoas vencelladas ao territorio que prestan a súa voz para transmitir desde dentro o que significa vivir aquí e formar parte desta identidade colectiva. Porque a autenticidade non só está nas imaxes: tamén está no acento, na maneira de expresarse e na forma de entender o mundo.
Este vídeo non é un punto final, senón o comezo dun relato máis amplo.
Unha campaña viva nas redes sociais
A nova campaña terá continuidade nas redes sociais oficiais da Costa da Morte, onde se irán publicando ao longo das vindeiras semanas e meses unha serie de minivídeos tematizados, centrados en distintos aspectos do destino: natureza, patrimonio, ciencia, gastronomía, cultura, paisaxe, persoas, experiencias…
Pequenas pezas audiovisuais que permitirán seguir afondando na identidade do territorio e ofrecer unha mirada máis detallada e emocional sobre aquilo que fai única á Costa da Morte.
Con esta campaña, a Costa da Morte reafirma a súa aposta por un modelo de promoción coherente co que é: un destino sostible, auténtico e orgulloso das súas raíces, que non busca parecerse a outros, senón proxectar con forza e honestidade a súa propia voz.
