Esta construción de 11 metros de altura, está situada na punta Ínsua do cabo Laxe, sobre unha loma duns 50 metros sobre o nivel do mar, que defende a vila e o porto dos ventos dominantes, nun espazo natural privilexiado.
A instalación luminosa actual data do ano 1996 e as súas características correspóndense coas dunha Baliza Xiratoria Acrílica, dotada de lámpadas de incandescencia conectadas á rede eléctrica. A súa aparencia luminosa correspóndese coa de grupo de 5 destellos en 20 segundos.
En augas próximas naufragou a Praia de Arnela en 1972, un barco de Corme que en arribada ao seu porto a mar o arrastrou ata as pedras e rompentes da Punta da Insua, salvándose só dous tripulantes.
O topónimo “A Costa da Morte”, define unha ampla zona de Galicia entre as rías de Muros e Noia e a da Coruña. Este curioso topónimo, segundo algúns estudosos, podería ter sido acuñado polos gregos para definir a rexión onde o Sol desaparecía a diario no mar e se atopase no país dos mortos ata a mañá seguinte.
