Situado a uns 1.500 m. ao Noroeste do núcleo principal do Ézaro, ten unha altura de 260m sobre o nivel do mar e dende el pódese contemplar a mole granítica do Monte Pindo, coñecido como o Olimpo Celta da Costa da Morte. O profundo val escarpado do curso do Río Xallas, tamén coñecido como Río Ézaro, e a súa desembocadura, a silueta do Cabo Fisterra coroado polo seu faro, as Illas Lobeiras de fronte, as vilas do Pindo e O Ézaro, ademais do encoro de Santa Uxía.
O 30 de agosto de 2012, o miradoiro do Ézaro foi final da décimo segunda etapa da Volta Ciclista España. Foi un feito que marcou un antes e un despois na meca do deporte e do turismo do Concello de Dumbría. O Ézaro comezou a formar parte da historia do ciclismo, un porto de 3ª categoría pero cun final de infarto, a penas 2 km con pendentes de ata o 30%, todo un desafío no cal logrou a súa victoria Joaquim Rodríguez, alias “Purito”.
O ano seguinte, O Ézaro volveu a formar parte do percorrido da Volta, sendo o miradoiro parte da etapa que remataba no Cabo Fisterra. Como consecuencia e, para dar resposta á demanda dos afeccionados ao ciclismo, xurdiu a celebración da marcha cicloturista “Desafío do Atlántico”, que actualmente se coñece como “Gran Fondo do Ézaro”. O 4 de xullo de 2015 tivo lugar o “Gran Fondo do Ézaro” no que participaron: Miguel Induráin, Claudio Chiappucci, Álvaro Pino, Oscar Pereiro, Gustavo César Veloso, Pedro Nimo, Marcos Pereiro, Ezequiel Mosquera,… acompañados polos grandes amantes do ciclismo.
* Debido á excesiva pendente da estrada que une a cascada co miradoiro, ramplas de até o 30%, o acceso está prohibido para autocares e caravanas.
