Instituto Fernando Blanco de Lema en Cee

O Instituto Fernando Blanco de Lema é un dos grandes emblemas culturais e educativos da vila de Cee. A súa historia comeza coa vida do propio Fernando Blanco de Lema, nado o 18 de outubro de 1796. Orfo de pai desde pequeno, foi criado polo seu curmán sacerdote ata que este foi asasinado polas tropas napoleónicas en 1809. A partir dese momento, foi enviado con seus irmáns a Ferrol e, con só 13 anos, emigrou a Cuba, onde fixo fortuna grazas ao seu espírito emprendedor.

Dous días antes de morrer, o 3 de abril de 1875, redactou o seu testamento, no que indicou que toda a súa riqueza, valorada en 750.000 pesos de ouro, debía empregarse para construír un colexio en Cee. Así nace o Instituto e a Fundación Fernando Blanco de Lema. As obras comezaron en 1880 e remataron en 1884. O 2 de outubro de 1886, Don Dionisio Barreda, catedrático da Universidade de Valladolid, inauguraba o primeiro curso académico.

O recinto do Instituto acolle tamén un fermoso xardín botánico e un monumento erguido en 1973 en honra ao filántropo ceense. Grazas á súa xenerosidade, Cee converteuse nun referente educativo e cultural na Costa da Morte, cun legado que perdura ata os nosos días.