Semana das Letras Galegas 2026 en Muxía

A Semana das Letras Galegas 2026 en Muxía chega cunha programación completa arredor dunha das datas máis especiais da cultura galega. Este ano, o Día das Letras Galegas recoñece o labor da xornalista e escritora Begoña Caamaño, unha autora que deixou unha fonda pegada na literatura galega e que destacou tamén polo seu compromiso social, especialmente na defensa dos dereitos das mulleres.

As actividades comezarán o 9 de maio ás 19:00 horas na praza Cabo da Vila, cunha homenaxe ao acordeonista Pazos de Merexo no centenario do seu nacemento e co concerto de Acordeireta. A programación continuará o 15 de maio ás 20:00 horas no Salón do Voluntariado co concerto da Coral Virxe da Barca, nunha cita musical moi especial para seguir celebrando a lingua, a memoria e a identidade cultural de Muxía.

O 16 de maio ás 12:00 horas celebrarase na praza Cabo da Vila o Gran Xogo das Letras Galegas, unha proposta participativa por equipos para coñecer mellor a orixe e o significado desta celebración, así como datos e curiosidades sobre os autores e autoras homenaxeados. As inscricións poden realizarse na Biblioteca. Esa mesma noite, ás 20:00 horas, o grupo Abril presentará na praza Cabo da Vila o seu álbum “Medrar”. O programa rematará o 17 de maio ás 12:00 horas cunha homenaxe e ofrenda ao poeta muxián Gonzalo López Abente, a quen lle foi dedicado o Día das Letras Galegas no ano 1971. En caso de choiva, as actividades previstas no Cabo da Vila trasladaranse ao Salón do Voluntariado, e o Gran Xogo das Letras Galegas á Sala Gervasio Sar.