93 aniversario das Misións Pedagóxicas en Malpica: mostra, monicreques e magosto

Malpica de Bergantiños conmemora o 93 aniversario da chegada das Misións Pedagóxicas cunha programación que une memoria histórica, cultura e propostas para gozar en familia. Do 16 ao 30 de outubro de 2026, lembramos unha iniciativa que levou a cultura a moitos recunchos e que tamén deixou pegada na nosa vila.

Mostra fotográfica: As Misións Pedagóxicas en Malpica

Do 16 ao 30 de outubro poderase visitar no espazo expositivo do Centro Cívico de Malpica unha mostra de fotografías para achegarnos á historia das Misións Pedagóxicas. O 20 de outubro de 1933 estreábase en Malpica o Retablo de Fantoches, unha lembranza moi especial daquel empeño por achegar a cultura a toda a veciñanza.

Domingo 18 de outubro: monicreques e magosto popular

A Praza Anselmo Villar Amigo, fronte á casa da santa, acollerá dúas actividades para compartir en familia:

• 17.00 h — Carapuchiña, da compañía Pedras de Cartón. Un espectáculo de monicreques, teatro de obxectos e comedia de 40 minutos, recomendado a partir dos 4 anos, que recupera dun xeito divertido o conto da Carapuchiña Vermella.
• 18.00 h — Magosto popular con chocolatada, para desfrutar xuntos das castañas, do chocolate e dunha tarde de encontro.

En caso de mal tempo, as actividades do 18 de outubro trasladaranse ao Auditorio do Centro Cívico de Malpica.

Celebrar a nosa historia, compartir cultura

Esta conmemoración é unha oportunidade para lembrar a historia cultural de Malpica e seguir levando a cultura a todas as xeracións. Organiza o Concello de Malpica de Bergantiños coa colaboración da Deputación da Coruña.