Na praia do Trece, sobre unha das ladeiras de Monte Branco, ascende a duna ramplante do mesmo nome que, xunto á de Ponteceso, é das máis altas de Europa. Destaca tamén pola presenza de varias especies de flora protexidas, como o caso de Corema Album ou Camariña, a cal dá nome á localidade de Camariñas. Tamén coñecida como “herba da fame”, o seu froito era consumido durante períodos de escaseza ante a falta de alimentos. Cómpre lembrar que estamos ante unha paisaxe de especial protección, polo que é conveniente non saírse dos camiños marcados e interferir o menos posible co medio. Un dos puntos desde o que podemos visualizar todo este contorno é o Cemiterio dos Ingleses, incluído na Ruta Europea de Cemiterios Singulares, e recoñecido como Itinerario Cultural Europeo.
