Nadal en Carballo

Este ano, Carballo terá un mes completo de actividades, como reflicte o calendario que ocupa as páxinas centrais do folleto que podes descargar ao final do post.

Pensando na dinamización do comercio haberá propostas como o Mercado da Ilusión, do 5 ao 8 de decembro; a Feira Dulce, que se celebrará no fin de semana do 28 e 29, coincidindo co feirón; os pinchos de Nadal que se servirán o 22 no mercado municipal ou os Cantos de Nadal que animarán as rúas comerciais os días 22 e 29. Un ano máis premiaremos as compras no comercio local con diferentes regalos, e, en colaboración co Centro Comercial Aberto (CCA), cuxas propostas están incluídas tamén no programa, contaremos cun stand chegado directamente de Laponia para que Papá Noel se sinta como en casa na estadía que realizará do 20 ao 24 de decembro.

Xunto ao imprescindible Nadal Pequespectacular, que, como sempre, ofrecerá tres espectáculos de circo, teatro e maxia de primeirísimo nivel, este ano chega o Nadal Rebuldeiro, pensado para facer moverse á rapazada. A peza central será Mundo Xogo, un parque de atraccións que inclúe espazos de Superthings, Playmobil, Rolly Toys, realidade virtual e radio control, e que ocupará a carpa da Praza do Concello do 14 ao 21 de decembro. Pero, ademais, os días 30 de decembro e 2 e 3 de xaneiro descubriremos a futuros emprendedores e emprendedoras da robótica, a mecánica e a enxeñaría cos obradoiros de construción de vehículos eléctricos infento. E xunto a todo iso, o 23 de decembro poderán sacar as bicis para participar nunha divertida xincana de elfos. As actividades do programa Apego, como a festa do día 20, e das bibliotecas completan a oferta vacacional para a infancia.

E pensando no público adulto temos tamén propostas diferenciadas, como os cursos de cociña de Nadal que se impartirán os sábados 14 e 21 na Escola de Hostalaría do Fórum Carballo ou os bailes dos domingos. O día 29 celebraremos un baile para todos os públicos na carpa da Praza do Concello, con cotillón, música e animación.

Descarga o programa completo aquí: https://carballo.org/media/documentos/NADAL_EN_CARBALLO_24__compressed.pdf