IX Descenso en Kaiak Ponte do Porto – Camariñas

O vindeiro sábado 26 de xullo de 2025, a Ría de Camariñas acollerá unha nova edición do Descenso en Kaiak Ponte do Porto – Camariñas, unha das actividades náuticas máis agardadas do verán na Costa da Morte. Organizada polo Club Náutico de Camariñas, esta travesía non competitiva ofrece unha experiencia única para gozar da paisaxe fluvial e mariña desde dentro da auga, percorrendo un dos contornos naturais máis fermosos e simbólicos da comarca.

O percorrido, duns 7 km (aproximadamente 4 millas náuticas), comeza xunto á ponte principal de Ponte do Porto e descende suavemente polo río Grande ata a súa desembocadura na ría, pasando por lugares tan singulares como a carpintaría de ribeira e o castelo de Cereixo. Tras unha primeira parada na praia fluvial do Ariño (Xaviña), a ruta continúa ata a praia de Lingunde para outro pequeno descanso, antes de alcanzar o porto deportivo de Camariñas, onde remata a travesía.

A actividade está aberta a persoas a partir dos 16 anos (os menores deben ir acompañados en kayak dobre), e é necesario saber nadar e ter coñecementos básicos no manexo do kayak. O uso do chaleco salvavidas é obrigatorio e a navegación realizarase en grupo compacto, con apoio e vixilancia constante por parte da organización. En caso de condicións meteorolóxicas adversas, poderase modificar ou cancelar a ruta.

As inscricións estarán abertas ata o xoves 24 de xullo. Para anotarse, cómpre cubrir o formulario dispoñible na web do Club Náutico e seguir as instrucións que se enviarán por correo electrónico para completar o pago. A inscrición non será válida ata que se confirme o pagamento.

Prezos XI Descenso en Kayak Ponte do Porto – Camariñas:

Con kayak propio:

• Seguro obrigatorio → 7,5 €

Kayak individual (seguro incluído):

• Socios: 15 €
• Non socios: 20 €

Kayak dobre (seguros incluídos):

• Socios: 30 €
• Non socios: 40 €

Para máis información ou dúbidas: info.cncamarinas@gmail.com