Horizonte Azul: Turismo Mariñeiro, Patrimonio Marítimo e Innovación Social

Horizonte Azul: Turismo Mariñeiro, Patrimonio Marítimo e Innovación Social celebrarase os días 25 e 26 de xuño na Casa da Cultura de Cee, convertendo a Costa da Morte nun punto de encontro para reflexionar sobre o mar, o patrimonio marítimo e as novas oportunidades vinculadas ao turismo azul. Trátase da X edición do curso de verán da Facultade de Turismo da Universidade da Coruña, organizada pola UDC coa colaboración da CMAT – Costa da Morte Asociación Turística.

O curso abordará o patrimonio marítimo como un recurso estratéxico para o desenvolvemento sostible dos territorios costeiros, poñendo o foco no papel das comunidades mariñeiras, das confrarías e das entidades locais na súa conservación, valorización turística e transmisión ás novas xeracións. A programación reunirá especialistas do ámbito académico, representantes institucionais e profesionais vinculados ao turismo e ao mundo do mar.

A matrícula está aberta, cunha tarifa xeral de 50 €, tarifa reducida de 30 € para estudantes, persoas desempregadas e pensionistas, e inscrición gratuíta para bolseiros do Curso de Verán 2026 da UDC. A actividade será presencial e está dirixida a estudantes, profesionais do sector turístico, persoas vinculadas ao ámbito mariñeiro e público interesado na relación entre mar, territorio, innovación social e turismo sostible.